Túrikmenstan elektr qýatyn Qazaqstan men Qyrǵyzstanǵa eksporttamaq

ASTANA. QazAqparat - «Ózbekenergo» kompanııasy Túrikmenstannyń Energetıka mınıstrligimen elektr qýatyn tranzıtteýge qatysty yntymaqtastyq jónindegi memorandýmǵa qol qoıdy.

Túrikmenbashı qalasyndaǵy «Avaza» kongress ortalyǵynda ótken eki el prezıdentteriniń kelissózderi nátıjesinde ázirlengen qujatqa Ózbekstan premer-mınıstriniń orynbasary Gýlomjon Ibragımov pen Túrikmenstannyń Energetıka mınıstri Charymyrat Pýrchekov qol qoıdy.

gazeta.uz  saıtyna Ózbekstan prezıdenti apparatyndaǵy málimetti bólisýshi sheneýniktiń aıtýynsha, memorandým Túrikmenstannyń elektr qýatyn Qazaqstan men Qyrǵyzstanǵa Ózbekstannyń energojúıesi arqyly tranzıtteý boıynsha yntymaqtastyqty damytýdy qarastyrady.

Qujat sondaı-aq «Túrikmenenergo» GEK-tiń «Ózbekenergoǵa» boryshyn ózara kelisken baǵa boıynsha elektr qýatyn jetkizý arqyly óteýdi de qamtıdy.