Túrikmenstan densaýlyq saqtaý mınıstrligi halyqty maska taǵýǵa shaqyrdy

AShHABAD. QazAqparat - Túrikmenstan densaýlyq saqtaý jáne medıtsınalyq ónerkásip mınıstrligi halyqty maska taǵýǵa shaqyryp, habarlama jasady, dep habarlaıdy QazAqparat «Týrkmenıstan segodnıa» aqparat agenttigine silteme jasap.

«Sońǵy kúnderi Ashhabad qalasy men ýálaıatarda atmosferalyq aýanyń jaı-kúıine júrgizilgen taldaý boıynsha, Túrikmenstan aýmaǵyna ońtústik-shyǵystan, soltústik-shyǵystan jáne soltústikten kelgen aýa aǵynyna baılanysty aýadaǵy shańnyń joǵary mólsheri tirkeldi. Bul adam densaýlyǵyna, eń aldymen tynys alý júıesine zııan.

Jaz mezgilinde aýa raıynyń adam aǵzasyna jaǵymsyz áserin boldyrmaý úshin otbasylyq dárigermen únemi keńesip, aldyn alý sharalaryn kúsheıtý qajet.

Mundaı kúnderi aýadaǵy shańnyń kóbeıýine baılanysty tabıǵı-ekzogendi yqpaldy tómendetý maqsatynda jeke qorǵanys quraldaryn - medıtsınalyq maskalardy taǵýǵa keńes beremiz», - delingen habarlamada.

Sondaı-aq, Túrikmenstan densaýlyq saqtaý mınıstrligi adamdarǵa 1 metr qashyqtyqty, jeke jáne qoǵamdyq gıgıena erejelerin saqtaý qajettigin eskertti.