Túrikmenstan aýmaǵy arqyly un eksporty artady – Serik Jumanǵarın

ASTANA. QazAqparat – Qazaqstan Túrikmenstan aýmaǵy arqyly un eksportyn ulǵaıtady. Bul týraly elordada ótip jatqan Qazaqstan men Aýǵanstan bıznes-forýmynda Premer-Mınıstrdiń orynbasary – saýda jáne ıntegratsııa mınıstri Serik Jumanǵarın málim etti, dep habarlaıdy QazAqparat tilshisi.

«Qazaqstan men Aýǵanstannyń ekijaqty formatta da, búkil óńir aýqymynda da saýda salasyndaǵy yntymaqtastyqty damytý úshin keń áleýeti bar. Birinshiden, Qazaqstan unynyń dástúrli jetkizilimin kóbeıtý mańyzdy. Bizdiń un Aýǵanstanǵa Ózbekstan aýmaǵy arqyly jetkiziletini belgili fakt. Bıylǵy 4 aıda Aýǵanstanǵa Ózbekstan aýmaǵy arqyly 150,8 mln AQSh dollary somasyna 450 myń tonnadan astam un jóneltildi», - dedi S. Jumanǵarın.

Onyń aıtýynsha, qazirgi kezde Ózbekstan arqyly júk tasymaly tarıfi joǵary. Sondyqtan eksport kólemin ulǵaıtý jáne aýǵan naryǵyn taýarlardyń jetkilikti kólemimen qamtamasyz etý úshin Aýǵanstanǵa tranzıttik tasymaldaýdyń múmkindikterin keńeıtý boıynsha jumys bastaldy.

«Búginde Túrikmenstan óz aýmaǵy boıynsha júk tasymalyn damytýǵa múddeli jáne óz aýmaǵy boıynsha jeńildikti tranzıttik tarıf usynýǵa daıyn. Bul baǵyt, eń aldymen, un jóneltýdiń balama baǵyty bolýy múmkin ekenin atap ótemiz. Osy maqsattar úshin QazTrade shıkizattyq emes taýarlardyń eksportyn ilgeriletýdiń biryńǵaı operatory otandyq taýarlardy Bolashaq stantsııasyna deıin jetkizýdi arzandatýǵa qoldaý jasaıdy. Sonymen qatar, biz Aýǵanstanǵa un men astyqty parıtettik negizde jetkizý úshin Ózbekstanmen arada elderimizdiń aýmaqtary boıynsha tranzıttik temir jol tasymaldaryna jeńildikti sharttar berý jónindegi ýaǵdalastyqtardy nyǵaıttyq», - dedi mınıstr.