Túrik qutqarýshylary sheberligin shyńdaý úshin Qazaqstanǵa oqýǵa kelgisi keledi

ALMATY. QazAqparat - Almaty qalasynyń óńirlik kommýnıkatsııalar qyzmetinde ótken brıfıngte QR Tótenshe jaǵdaılar mınıstrligi respýblıkalyq jedel-qutqarý jasaǵynyń basshysy Vladımır Tsoı Túrkııadaǵy izdestirý-qutqarý jumystarynyń jaı-japsaryn aıtyp berdi, dep habarlaıdy QazAqparat tilshisi.

«7 aqpanda Prezıdent tapsyrmasymen Almatydan baýyrlas Túrkııa halqyna kómektesý úshin barlyǵy 33 adam jáne Apattar medıtsınasy ortalyǵynan 5 maman attandy. Túrkııaǵa barǵannan keıin qazaqstandyq qutqarýshylar Gazıantep qalasynda jumys istedi. Almatylyqtar túrik koordınatorlarynan eń aýyr nysandy kórsetýdi ótingen. Ol jerge 10 adam jiberildi. Tolyǵymen qıraǵan úsh qabatty ǵımarat boldy. Biz oǵan kózben sholý jasadyq, oǵan jaqyn turǵan úıdiń de qıraý qaýpi boldy. Tekserý kezinde olar bir áıeldi tapty, ony shyǵarý úshin túni boıy jumys istedi. Ǵımarattyń basylyp qalǵany sonsha, beton tóbesi men edenniń arasy 30 santımetr boldy, qıyn jaǵdaıda jumys isteýge týra keldi», – deıdi Vladımır Tsoı.

Aıtýynsha, tańerteń qutqarýshylar taǵy bir máıitti tapqan. Ol tabylǵan áıeldiń qyzy edi. Saqtyq kerek boldy, ol kezde barlyǵy 5 máıit tabyldy.

Zardap shekkenderdi shyǵarý úshin úsh qabatty ǵımaratty bólshekteý qajet boldy, jumys eki kúnge sozyldy, odan qaza bolǵan 19 adamnyń máıiti shyǵaryldy.

«Bir jaǵynan emotsıonaldy qysym kóp boldy, óıtkeni silkinister jalǵasa berdi. Kez kelgen sekýndta úı qulaýy múmkin edi, biraq biz tapsyrmany oryndadyq, zergerler sııaqty jumys istedik. Ár saǵattyq jumystan keıin kınologtardy jiberdik, bes mınýttyq tynyshtyq jarııalandy», - dep eske alady Vladımır Tsoı.

Qutqarýshylarǵa 3 ıisshil ıt kómektesti, olar o bastan tiri adamdy izdeýge úıretilgen.

Ólgen adamdardy izdeýdi ıtter sol jerde, Túrkııada úırendi. Olardyń arasynda Djeıkob bar, malınýa tuqymynyń belgııalyq ovcharkasy.

«Djeıkob qıyn jaǵdaıda jumys istedi, dıametri shamamen 50-60 santımetr bolatyn 3 metr tereńdikke tiginen ótý kerek boldy. Dybysqa qaraı jumys isteý kerek edi. Bizdiń jolymyz boldy, izdeý qurylǵylaryn qoldana otyryp, zardap shekkenderdi dál taptyq. Qurylys qoqystary shelekterge salynyp, medıtsınalyq qurylǵylardan tútik jasalyp, ony oıyqqa túsirip, zardap shekkenderge osylaı sý jiberildi», - dedi RJQJ basshysy

Qazaqstandyq qutqarýshylar barlyǵy 7 adamdy qutqaryp, qaza bolǵan 88 adamdy shyǵardy.

Qazaqstan qutqarýshylarynyń kásibı sheberligin túrik áriptesteri men qarapaıym azamattar joǵary baǵalady.

«Olar aýdarmashy taýyp, «qazaqtar nege sonshalyqty myqty, sizderde jer silkinisi jıi bolyp tura ma?» dep surady. Oǵan men Qazaqstanda bilikti qutarýshylar mektebi qalyptasqanyn aıttym. Rasynda, elimizde óte jaqsy mektep qalyptasqan. Biz jyl saıyn polıgonda oqý-jattyǵý jıyndary men jarystar ótkizemiz. Bul daıyndyq Túrkııada óte paıdaly boldy», - dep jalǵastyrdy Vladımır Ioı.

Sonymen qatar ol qutqarýshylarǵa Qazaqstannyń Túrkııadaǵy elshiligi men eriktiler qoldaý kórsetkenin tilge tıek etti.

«Olar túrik qutqarýshylaryn oqytýǵa kómektesýdi ótindi. 30 qutqarýshysyn Almatyǵa oqýǵa jiberýge daıyn»,- dedi spıker.