Túrik kompanııasy Jambyl oblysynda soda óndirý zaýytyn salady

NUR-SULTAN. QazAqparat – Túrik kompanııasy Jambyl oblysynda eksportqa baǵyttalǵan kaltsıılendirilgen soda óndirý zaýytyn salady. Bul týraly búgin QR Premer-Mınıstri Álıhan Smaıylovtyń Yildirim Holding kompanııalar tobynyń prezıdenti jáne bas dırektory Robert ıÝksel Iyldyrymmen kezdesýinde belgili boldy, dep habarlaıdy QazAqparat primeminister.kz saıtyna silteme jasap.

Kompanııa basshysy Premer-Mınıstrge kompanııanyń Qazaqstandaǵy qyzmeti men jańa jobalardy iske asyrý perspektıvalary týraly aıtyp berdi.

Qazirgi ýaqytta Yildirim Holding Aqtóbe oblysynda hrom kenin jáne kontsentratyn óndirý boıynsha tabysty jumys istep keledi, sondaı-aq «Qazgeologııa» AQ-men birlesip, shıkizat bazasyn tolyqtyrý aıasynda Pavlodar, Qaraǵandy jáne Shyǵys Qazaqstan oblystarynda geologııalyq barlaý júrgizip jatyr.

R.ıÝ. Iyldyrymnyń aıtýynsha, 2013 jyldan bastap holdıng Qazaqstan ekonomıkasyna 500 mln dollardan astam ınvestıtsııa quıǵan.

Kezdesý barysynda Álıhan Smaıylov QR Úkimeti Yildirim Holding kompanııasynyń Qazaqstandaǵy eń iri túrik ınvestorlarynyń úshtigine kiretinin eskere otyryp, bizdiń elge ınvestıtsııalardy keńeıtýdi quptaıtynyn jetkizdi.

Premer-Mınıstr holdıng bastamashylyq etip otyrǵan – Jambyl oblysynda kaltsıılendirilgen soda óndirý zaýytyn salý jobasynyń mańyzdy ekenin atap ótti. Bul jobany iske asyrý nátıjesinde Qazaqstan ónim ımportynan eksportqa kóshýi tıis.

«Bul joba Qazaqstan-Túrkııa ınvestıtsııalyq yntymaqtastyǵy tarıhynda serpindi bolatyny sózsiz. Memleket qazirdiń ózinde qajetti ınfraqurylymdy qamtamasyz etý boıynsha óz mindettemelerin oryndaýǵa kiristi. Osyǵan baılanysty 2025 jylǵa deıin zaýytty iske qosý úshin qurylys-montajdaý jumystarynyń belsendi kezeńi bastalady dep otyrmyz», — dedi Álıhan Smaıylov.

Óz kezeginde Robert ıÝksel Iyldyrym qazaqstandyq áriptesterine jobalardy júzege asyrýda kórsetken kómegi úshin alǵys bildirip, Yildirim Holding-tiń bizdiń elmen yntymaqtastyqty keńeıtýge daıyn ekenin atap ótti.