Túrik kompanııasy Shýda qant zaýytyn salady

ASTANA. QazAqparat – Shý qalasynda jańa qant zaýyt salynady. Bul týraly QR Premer-Mınıstri- Saýda jáne ıntegratsııa mınıstri Serik Jumanǵarın málim etti, dep habarlaıdy QazAqparat tilshisi.

«Elimizde taǵy bir qant zaýytyn salý máselesi uzaq ýaqyt talqylanyp keldi. Túriktiń Konya kompanııasymen birlesip Shýda qant zaýyt salynady. Qazir atalǵan jobany qarastyryp jatyrmyz. Qant salasyn damytý baǵdarlamasy 2025 jylǵa deıin óndiristi 270 myń tonnaǵa deıin ósirýge múmkindik beredi», - dedi Serik Jumanǵarın Úkimet úıinde ótken brıfıng barysynda.

Mınıstrdiń aıtýynsha, elimizde qant tapshylyǵyna qatysty problema týyndamaıdy.

«Ótken jyly elimizde 306 myń tonna qant óndirildi. Bul óte joǵary nátıje. Sebebi buǵan deıin kórsetkish jylyna 100 myńnan sál joǵary bolǵan»- deıdi ol.

Aıta ketsek, Álıhan Smaıylov Úkimet otyrysynda taýarlardyń kólemi men baǵasyn erekshe baqylaýda ustaý qajettigin tapsyrǵan edi.

Sonymen qatar Premer-Mınıstr azyq-túlik baǵasyna qatysty ákimdikterdiń tıimdi jumysyn synǵa aldy.