Túrik ınvestory Jambylda kaltsıılendirilgen soda óndiretin zaýyt salady

TARAZ. QazAqparat – Jambyl oblysynyń ákimi Berdibek Saparbaev Yildirim Holding kompanııasynyń ókilderimen kezdesip, Sarysý aýdanynda kaltsıılendirilgen soda óndiretin zaýyt salý jobasyn iske asyrý barysyn talqylady, dep habarlaıdy QazAqparat tilshisi.

Túrik kompanııasyna qazaqstandyq naryq jat emes. Óńir basshysy osy jyldar ishinde baýyrlas halyqpen tyǵyz jáne dostyq qarym-qatynas ornaǵanyn atap ótti.

«Investorlar negizinen bıznesti damytýǵa qolaıly jáne bolashaǵy bar óńirlerge barady. Osy oraıda Memlekettik baǵdarlamalar ázirlengen desek, búginde olar ózderiniń tıimdiligin dáleldeı túsýde. Bul baǵdarlamalar aıasynda sizderdiń kompanııalaryńyzǵa da jan-jaqty qoldaý kórsetiletin bolady», - dedi Berdibek Saparbaev.

Yildirim Holding-tiń bas dırektory Ismaıl Djeılan ınvestıtsııalyq joba týraly egjeı-tegjeıli aıtyp berdi. Qurylysy keler jyly bastalady dep josparlanǵan zaýyttyń jyldyq jobalyq qýaty 400 myń tonnany quraıdy. Bolashaqta bul kórsetkish jylyna 1,2 mıllıon tonnaǵa deıin artady dep kútilýde. Nysan qurylysyna 325 mıllıon AQSh dollaryn ınvestıtsııalaý josparlanýda.

1500-den astam adam tartylatyn qurylys-montajdaý jumystary kelesi jyly bastalmaq. Joba 2023 jyly paıdalanýǵa beriledi dep kútilýde. Ol iske qosylǵannan keıin bıýdjetke jyl saıyn 8 mıllıon AQSh dollary mólsherindegi salyq túsimi túsip otyrmaq. Onda 250 adam turaqty jumyspen qamtylady. Kásipker kásiporynǵa jergilikti mamandardyń tartylatynyna sendirdi. Ol Qazaqstan aýmaǵynda júzege asyrylǵan basqa da jobalardy mysalǵa keltirdi.

«Zaýyt qurylysy bastalmaı turyp jáne onyń ashylýyna deıin qandaı mamandar qajet ekenin saralap, olardy oqytý men daıyndaýdy búginnen qolǵa alý kerek, - dedi aımaq basshysy.

Berdibek Saparbaev ınvestorlarǵa ishki jáne syrtqy naryqtaǵy sodaǵa degen suranysty zerdelep alýdyn mańyzdylyǵyn jetkizdi.

«Óndirilgen ónim suranysqa ıe bolýy tıis, - dep atap ótti oblys ákimi.

Ismaıl Djeılan ónim tek Qazaqstanda ǵana emes, sonymen qatar álemdik naryqta da suranysqa ıe bolatynyna sendirdi. Seriktester bul iske kaltsıılengen soda óndirisinde qoldanylatyn jańa tehnologııalardy tartýǵa nıetti.

Sonymen qatar, zamanaýı óndiris tolyǵymen qaldyqsyz júıede jumys jasamaq. Qaldyqtar qaıta óńdeletin bolady.

Kezdesý barysynda ınfraqurylymmen qamtamasyz etý máseleleri jáne jobany júzege asyrýǵa qatysty basqa aspektiler saralandy.