Túrik dıplomaty BUU Bas assambleıasynyń tóraǵasy bolyp saılandy
BUU Bas assambleıasynyń zalynda Assambleıanyń 75-shi sessııasynyń tóraǵasy saılandy. Saılaý erekshe formatta ótti. Ár eldiń delegaty maska kıip, bir-bireýden ishinde eshkim joq bos zalǵa kelip daýys berdi. Sosyn olar tez arada BUU shtab-páterinen ketip qaldy.
Daýys berý nátıjesi boıynsha túrik dıplomaty, saıası qaıratker Volkan Bozkyr BUU Bas assambleıasynyń 75-shi sessııasynyń tóraǵasy bolyp saılandy.
Aıta keteıik, Bas assambleıa tóraǵasy bes aımaqtyq top arasyndaǵy rotatsııa qaǵıdasyn saqtaı otyryp saılanady. 75-shi sessııa tóraǵasy Batys Eýropa men sol mańaıdaǵy basqa da elder arasynan shyǵýǵa tıis bolatyn. Ol elderdiń qataryna Túrkııa da kiredi.
Atalǵan aımaqtyq top túrkııalyq dıplomattyń kandıdatýrasyn biraýyzdan maquldap usynǵan. Odan basqa eshqandaı úmitker bolmaǵanda daýys berýdiń qajeti bolmas edi. Alaıda birneshe el saılaý ótkizýdi ótindi. Nátıjesinde 178 eldiń ókili Volkan Bozkyrdy jaqtap daýys bergen.
Eske sala keteıik, biz buǵan deıin BUU Bas Assambleıasy Qaýipsizdik Keńesiniń turaqty emes bes jańa múshesi saılanǵanyn habarlaǵan bolatynbyz.