«Turǵynúıjınaqbanki» «Qoljetimdi baspana-2020» baǵdarlamasyn júzege asyrýda shalys basty
«Maǵan jańa baspana tóraǵaǵa, onyń orynbasarlaryna, banktiń Almatydaǵy fılıalynyń dırektoryna, onyń aǵasyna, departament dırektoryna, onyń apaıyna bólingendigi týraly anyqtama berdi. Banktiń basqarýshy dırektory, onyń aǵasy, sondaı-aq keıinnen páterdi úshinshi tulǵaǵa syıǵa tartqan uly baspana alǵan. Men ýaqytymdy shyǵyndap mynaý dalbasany jasaıtyn is bolmaǵannan keıin tizbekteı atap otyrǵanym joq. Men qarap otyrmyn, banktiń jeńildikpen páter alǵan 20-dan astam qyzmetkeri bar. Biz sonda bankti onyń qyzmetkerleri úshin qurdyq pa?» - degen-di Elbasy ashyna. Mine, osylaısha Memleket basshysynyń aralasýynyń arqasynda zańsyz alynǵan talaı páter qaıtarylǵan da edi.
Al búgin atalǵan baǵdarlamanyń júzege asyrylý barysy egjeı-tegjeıli talqyǵa túsken Úkimet otyrysynda bank basshysy Aıbatyr Jumaǵulov Premer-Mınıstr Serik Ahmetov tarapynan syn sadaǵyna iligip, qyzmetine taıaýda ǵana taǵaıyndalǵannan keıin ǵana jazadan aman qaldy.
Sonymen alqaly jıynda baıandama jasaǵan A.Jumaǵulovtyń aıtýynsha, bank «Qoljetimdi baspana-2020» baǵdarlamasyn eki baǵytta iske asyrýda. Birinshisi - jergilikti atqarýshy organdardyń respýblıkalyq bıýdjet qarajaty esebinen turǵyn úı salyp, ony bank júıesi arqyly halyqtyń barlyq sanatyna ótkizý. Ekinshisi - jergilikti atqarýshy organdardyń jas otbasylar úshin salatyn jaldamaly turǵyn úılerin qarjylandyrý. Bul rette eskererligi qurylysqa, onyń sapasyna jáne belgilegen merzimde salynylýyna jergilikti atqarýshy organdar jaýapty. Al halyqtyń baspana satyp alýyn turaqty qarjylandyrý jaýapkershiligi banktiń moınyna artylǵan. «Qolda bar málimetterge júginetin bolsaq, baspanaǵa degen eń kóp suranys Astana men Almaty qalalarynda tirkelgen. Al, jalpy Qazaqstanda bir baspanaǵa ortasha eseppen 2-den astam ótinish qabyldandy. Banktiń halyq arasynda júrgizip otyrǵan nasıhat jumystaryn eskerer bolsaq, suranys kelesi jyldary budan da joǵary bolmaq. Tıisinshe turǵyn úı kólemi salynǵan jaǵdaıda «Turǵynúıqurylysjınaqbanki» budan da kóp kólemde qarjy berýge daıyn», - dedi A.Jumaǵulov.
Bank basshysynyń atap ótýinshe, ótken jyly halyqtyń barlyq sanatyna arnalǵan 484,5 myń sharshy metr turǵyn úı, ıaǵnı 7264 páter salynyp, paıdalanýǵa berý josparlanǵan. 2014 jyldyń 1 qańtardaǵy derekterge qaraǵanda, bankke kelip túsken paıdalanýǵa berý aktilerine saı 308,9 myń sharshy metr turǵyn úılerdiń ıeleri qonys toıyn toılaǵan. Bul jospardyń 64 paıyzy. Al jas otbasylarǵa arnalǵan turǵyn úı baǵyty boıynsha josparlanǵan 144,2 myń sharshy metrdiń is júzinde 111,2 myń sharshy metri paıdalanýǵa berilgen. Bul josparly kólemniń 77 paıyzy.
«Mine, qarańyzshy, - dedi aldyndaǵy slaıdtarǵa jiti qarap otyrǵan Úkimet basshysy Serik Ahmetov bank basqarmasynyń tóraǵasy Aıbatyr Jumaǵulovqa qarata, oblystardyń teń jartysy «Turǵynúıqurylysbanki» boıynsha baspanany paıdalanýǵa berý josparyn 100 paıyzǵa oryndaǵan. Al óńirlerdiń qalǵan jartysy 75-ten 0 paıyzǵa deıin oryndaǵan. Sonda sizder úshin Qazaqstanda iriktelgen óńirler bar bolǵany ma? Aqtóbe, Qaraǵandy, Batys Qazaqstan, Qostanaı, Qyzylorda, Soltústik Qazaqstan, Aqmola, Almaty oblystary nege 100 paıyzǵa oryndaǵan? Bárine birdeı júıeli, biryńǵaı sebebi bolsa túsiner edim. Al qalǵan óńirler Shyǵys Qazaqstan - 75, Atyraý - 69, Almaty - 60, OQO - 39, Astana, Pavlodar - 20, Mańǵystaý men Jambyl - 0 paıyz. Ol jaqta baspana alǵysy keletinderdiń bolmaǵany ma?», - dedi S.Ahmetov.
Al bank basshysynyń atap ótýinshe, elimizdiń barlyq óńirlerinde baspanaǵa suranys 2 eseden asady. Degenmen, bank qurylys jumystaryn jedeldetý úshin qandaı da bir sharalar qoldanýǵa qaýqarsyz. ıAǵnı, qarjy ınstıtýty qurylysty qarjylandyrýdy ǵana júzege asyrady ári ony barlyq óńirler boıynsha da tyńǵylyqty oryndaýda. Al, qurylys jumystarynyń jaýapkershiligi jergilikti atqarýshy organdardyń moınyna artylǵan júk. «Sondyqtan da oǵan jaýap bere almaımyn. Árıne, men qurylys jumystarynyń nelikten kesheýildeýine qatysty obektıvti sebepterin bilemin. Degenmen, bank bul úderiske qandaı-da bir joldar arqyly yqpal ete almaıdy»,- dedi bank basshysy.
«Sizder paıdalanýǵa berý josparyn oryndap otyrǵan joqsyzdar ǵoı. Aqsha bar, lımıt aıqyndalǵan. Bul sanat boıynsha paıdalanýǵa berý jospary - 484 myń sharshy metr. Іs júzinde paıdalanýǵa berilgeni - 308 myń sharshy metr. Sizderdiń ıgergen óńirge qarjyny ulǵaıtýǵa quqylaryńyz bar, nege paıdalanbaısyzdar?», - dedi Úkimet basshysy. Bul oraıda A.Jumaǵulov jospar arqyly belgilengen óńirlermen kelisim jasalyp, pýl qalyptastyrǵandyqtaryn, ıaǵnı bank óz mindetterin tolyq atqaryp otyrǵandyǵyn atap ótti. «Bir taraptyń barlyǵyn istep, kelesiniń túk atqarmaýy múmkin emes. Demek, jalpy banktiń, sol óńirlerdegi fılıaldaryńyzdyń jumysy báseń. Ol jaqta qanshama adam otyrsa da, olar jumys istemeıdi degen sóz. Siz de salǵyrttyqqa salynǵansyz. Bizdiń taraptan bári jasaldy deısiz. Eger osy mańyzdy baǵyt boıynsha Mańǵystaý men Jambyl oblystarynda nól sharshy metr bolsa, eshteńe de jasalynǵan joq qoı. Azamattardyń barlyq sanattaryna, onyń ishinde jas otbasylarǵa arnalǵan baspana - mańyzdy baǵyt. Alaıda, ShQO-da - 0, Astanada - 0, OQO-da - 0. Sizdi aqtap alar jalǵyz jaıt, bul qyzmetke endi ǵana kiristińiz. Resýrstar bar, aqsha bar. Demek, olardy bul baǵytta ákimder jumys istep jatqan basqa óńirlerge baǵyttaý qajet. Mine, banktiń mindeti osy. Pýldy jınap alady, tastaı salady. Bar bolǵany osy. Odan da qurylys qarqyndy júrip jatqan, ákimder qyzyǵýshylyq tanytyp otyrǵan óńirlerge bólip bersin. Sol jaqqa barsyn jumys isteýge. Ol óńirlerden fılıaldardy alyp, jumys istep jatqan óńirlerdegilerdi kúsheıtý úshin baǵyttaý qajet. Eger ol (Turǵynúıjınaqbanki) qarjynyń ne bári 10 paıyzyn ıgerer bolsa, onda bizge «Turǵynúıjınaqbankiniń» qajeti qansha? Onda bul qarjyny basqa baǵyttarǵa baǵyttaý máselesin qarastyraıyq», - degen S.Ahmetov Ekonomıka jáne bıýdjettik josparlaý mınıstri Erbolat Dosaevqa sóz berdi.
Onyń atap ótýinshe, kelisimshart bank pen jergilikti atqarýshy organdar arasynda jasalatyndyqtan, bank tapsyrys berýshi bolyp sanalady. «Egerde búgingi qurylymdaǵy jaýapkershilikke qandaı da bir ózgertýler engizý qajet bolsa, onda biz Óńirlik damý mınıstrligimen birlesip qaraýǵa ázirmiz», - degen ol bank tólem jasaıtyn bolǵandyqtan, qurylys barysyn tikeleı baqylaý múmkinshiligi tetigin berý qajettigin atap ótti. Sondaı-aq mınıstr buǵan deıin jasalǵan kelisimsharttarda qandaı da bir kemshilikter bolyp, ony jeleý etken jergilikti atqarýshy organdar óz mindettemelerin oryndamaıtyn bolsa, onda aldaǵy ýaqytta da kemshilikterge jol bermeý úshin mundaı tártipterdi qaıta qarastyrý qajettigin basa aıtty.
«Qoldaımyz, Óńirlik damý mınıstrligi jáne «Báıterekpen» birlesip, bul máseleni qarastyryńyzdar», - dedi Premer-Mınıstr.