«Turǵynúıqurylysjınaqbanki» AQ «Qoljetimdi baspana – 2020» baǵdarlamasyn júzege asyrý ádisterin ádil ári ashyq etip ózgertedi

ASTANA. 19 qazan. QazAqparat - 17 qazan kúni Astanadaǵy baspasóz máslıhatynda «Báıterek» Ulttyq basqarýshy holdınginiń tóraǵasy Qýandyq Bıshimbaev málim etken «Turǵynúıqurylysjınaqbankiniń» basshysy Nurbıbi Naýryzbaevanyń otstavkaǵa jiberilýi Prezıdent Nursultan Nazarbaevtyń ótkir synynan keıingi logıkalyq qadam.

Atap óteıik, «Báıterek» ulttyq basqarý holdıngi damý ınstıtýttaryn, qarjy uıymdary men ulttyq ekonomıkany damytýdy basqarý júıesin ońtaılandyrý maqsatynda QR Prezıdentiniń 2013 jylǵy 22 mamyrdaǵy № 571 «Damý ınstıtýttaryn, qarjy uıymdary men ulttyq ekonomıkany damytýdy basqarý júıesin ońtaılandyrý jónindegi keıbir sharalar týraly» jarlyǵymen quryldy.

Esterińizge sala keteıik, 11 qazanda Elbasy Nursultan Nazarbaev QR Úkimetiniń keńeıtilgen otyrysynda birqatar syn-eskertýler men naqty tapsyrmalar bergen bolatyn. Sonymen qatar otyrys barysynda Prezıdent «Turǵynúıqurylysjınaqbanki» AQ basshylyǵyna ótkir syn aıtyp, Q. Bıshimbaevqa birqatar tapsyrmalar júktedi.

Memleket basshysynyń atap ótýinshe, atalǵan banktiń basshylyq qyzmetkerleri mıllıondaǵan teńge jalaqy ala otyryp, «Qoljetimdi baspana-2020» baǵdarlamasy aıasynda páterlerdi jeńildikpen satyp alǵan. «Maǵan jańa baspana tóraǵaǵa, onyń orynbasarlaryna, banktiń Almatydaǵy fılıalynyń dırektoryna, onyń aǵasyna, departament dırektoryna, onyń apaıyna bólingendigi týraly anyqtama berdi. Banktiń basqarýshy dırektory, onyń aǵasy, sondaı-aq keıinnen páterdi úshinshi tulǵaǵa syıǵa tartqan uly baspana alǵan. Men ýaqytymdy shyǵyndap mynaý dalbasany ister is bolmaǵannan keıin tizbektep atap otyrǵanym joq. Men qarap otyrmyn, banktiń jeńildikpen páter alǵan 20-dan astam qyzmetkeri bar. Biz sonda bankti onyń qyzmetkerleri úshin qurdyq pa?» - dedi Elbasy.

Q. Bıshimbaevtyń aıtýynsha, baǵdarlamaǵa ózgerister engizý qajet. «Biz bul máseleni osy baǵytqa basshylyq etetin barlyq memlekettik organdarmen birlesip jumys atqaratyn bolamyz. Páter bólý kezinde áleýetti baǵdarlamaǵa qatysýshylarda baspanasynyń bolmaýy jáne turǵyn úı jaǵdaıyn jaqsartýǵa muqtaj bolýy sekildi faktorlar eskeriletin bolady», - dedi ol. Baspanasy bar turǵyndar ekinshi kezekte qarastyrylady. Bank basshylary men olardyń týystaryn «Qoljetimdi baspana-2020» baǵdarlamasyna qatysýyn shekteıtin sharalar qarastyrý týraly tapsyrma berilgen bolatyn jáne bul tapsyrmalar qazir oryndalýda. Bul mindetti oryndaý «Turǵynúıqurylysjınaqbanki» AQ jańa basshysy Aıbatyr Jumaǵulovqa júkteldi.