Turǵyndarmen dóreki sóılesken aqtóbelik sheneýnikter jazalandy
QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń oblystyq departament basshysy Rasýl Medetov jyldyń alǵashqy toqsanyn qorytyndylady.
Óńirde áli de bolsa aldyna kelgen turǵynmen durys sóılese almaıtyn memlekettik qyzmetkerler bar. Máselen, Qarǵaly aýdany, Velıhov aýyldyq okrýginiń ákimi Aınagúl Halıýllına aýyl turǵyny J.Muhambetovaǵa beıádep sózder aıtyp, onyń ar-namysyna tıgen. Aýyl ákimi qyzmetine sáıkes emes dep eskertý aldy.
«Aqtóbe oblystyq mádenıet, qujattama jáne muraǵattar basqarmasynyń basshysy Marjan Qorǵanbaeva attestatsııa ótkizgen kezde S.Jaryqovamen durys sóılespegen. Ádep keńesiniń sheshimi boıynsha mádenıet salasyn basqaryp otyrǵan M.Qorǵanbaevaǵa sógis berildi. Sonymen qatar, Aqtóbe qalalyq bilim bólimi basshysynyń orynbasary Rýslan Áljanovqa qatysty tártiptik is qaraldy. Qoǵamnyń synyna ilikken bilim bóliminiń jaýapty qyzmetkeri R.Áljanov jáne Alǵa aýdandyq jer qatynastary bóliminiń basshysy E.Bekesh sógis aldy»,- dedi Rasýl Medetov.
Aıta keteıik, baspasóz konferentsııasy kezinde memlekettik qyzmetkerlerdiń densaýlyǵyn tekseretin arnaıy qabyldaý ornyn ashý týraly aıtyldy. Emhana ishindegi jańa qyzmet memlekettik mekeme jumysshylaryn kezeksiz qabyldaýǵa septigin tıgizedi.
«Oblys ákimdigimen kelisip, emhana ishinen ýchaske ashý josparlanyp otyr. memlekettik qyzmetker jumys ýaqytynda emhanaǵa baryp, kezeksiz dárigerge qaralyp, em alaýǵa múmkindik alady. Sonymen qatar, memlekettik qyzmetkerlerdiń sportpen shuǵyldanýyna da jaǵdaı jasaýymyz kerek»,- dedi R.Medetov.