Turǵyndardyń ataýly kómekti alýy qadaǵalanady - Túrkistan oblysynyń ákimi

TÚRKІSTAN. QazAqparat - Búgin Túrkistan oblysynyń ákimi Ómirzaq Shókeev Ordabasy aýdanyna issaparmen bardy. Óńir basshysy aýdandaǵy birqatar nysandardy aralap, óndiristik oryndarda atqaralyp jatqan jumystarmen tanysty, dep habarlaıdy QazAqparat tilshisi.

Aımaq basshysy bastaǵan top eń aldymen Qajymuqan aýyldyq okrýgindegi eshki sútin óndiretin aýylsharýashylyq kooperatıvinde boldy. Búginde sharýa qojalyǵynyń jumysy órkendep keledi. Kásipker Jeńis Toǵyzaqbaev memleketten 500 mln teńge nesıe alyp, Gollandııanyń zaanen tuqymdy 500 bas eshkisin ustap otyr. Búginde óndirilgen eshki sútinen aıran, qaımaq, qurt, súzbe jáne ıogýrt ónimi shyǵarylýda. Sharýashylyqta 32 adam turaqty túrde jumys istep, ortasha 100 myń teńge kóleminde jalaqy alady. Sharýa aldaǵy ýaqytta úshinshi ferma ǵımaratyn salyp, sút óńdeý zaýytyn iske qosýdy josparlap otyr. Sondaı-aq eshki basyn 6 myń basqa jetkizip, táýligine 15 tonna sút óńdeýdi kózdegen. Munan keıin oblys basshysy Qajymuqan aýyldyq okrýgindegi «Beıneý-Shymkent» magıstraldy gaz qubyryn aralady.

Sonymen qatar Temirlan aýylynda «Órleý» baǵdarlamasy aıasynda iske asyrylǵan jobalar kórmesimen tanysty. Badam óndiristik aımaǵyndaǵy «Karlskrona» JShS-niń temir quımalardy óńdeıtin zaýytty kórdi. Atalǵan kásiporyn búgingi tańda mashına jasaý salasynda aldyńǵy orynda keledi. Kompanııa Ortalyq Azııada teńdesi joq zamanaýı tehnologııamen jabdyqtalǵan. Zaýyt jylyna 3700 tonna ónim shyǵarýǵa qaýqarly.

Óńir basshysy aıaldaǵan kelesi nysan Bórjar aýyldyq okrýgindegi «Aleksandrovskıı sad» JShS-niń ıntensıvti qarqyndy baý-baqshasy boldy. Munda 17 gektar jerge jańa tehnologııamen tamshylatyp sýǵarý ádisimen baý egilgen. Jobanyń qarjy kólemi - 150 mln teńgeni quraıdy. Sharýashylyqtyń qojaıyny Baqtııar Taǵaev oblys ákimine aldaǵy ýaqytta baýdyń kólemin arttyratynyn aıtty. Ómirzaq Shókeev bul bastamaǵa ákimdik tarapynan tıisti qoldaý kórsetetindigin jetkizdi. Aýdandaǵy kásipkerlik nysandarymen tanys bolǵan oblys ákimi isker azamattarǵa otandyq ónimdi óndirip, el turǵyndaryn sapaly ónimmen qamtýǵa shaqyrdy.

«Memlekettik ataýly áleýmettik kómekti alyp qana qoımaı, ony tabys kózine aınaldyra bilý kerek. Sonda berekesi mol bolady. Aldaǵy ýaqytta ár aýdanda azamattardyń ataýly kómekti alýy qadaǵalanady», - dedi oblys ákimi Ómirzaq Shókeev.