Turǵyndar túıneme juqtyrǵan: Aqmola oblysyna 1,7 myń dozadan astam vaktsına jetkizildi
«Áleýmettik jelilerde taralyp jatqan qazaqstandyq saýda sórelerinde túıneme juqtyrǵan et ónimderi túskeni týraly aqparat shyndyqqa janaspaıdy. Aqmola oblysynyń Qosshy qalasynda túıneme oshaqtarynyń bolýy týraly habarlama da jalǵan bolyp otyr», - dedi Aýyl sharýashylyǵy mınıstrliginiń baspasóz qyzmetinen.
Vedomstvodan atap ótkendeı, Aqmola oblysynyń Jarqaıyń aýdanyndaǵy Úshqarasý aýylynda halyq arasynda túınemeniń teridegi túri tirkeldi. Barlyq naýqas medıtsına qyzmetkerleriniń baqylaýyna alyndy. Klınıkalyq hattamaǵa sáıkes em qabyldap jatyr. Aýdandyq polıtsııa bólimi aýylda aýyl sharýashylyǵy ónimderin áketýdi shekteıtin blok beketter qoıyp, karantın jarııalady. «Úshqarasý» JShS mal sharýashylyǵy kásiporny dırektorynan mal ólimi týraly habarlama 28 tamyzda kelip túsken. Et jedel túrde tárkilenip, ólgen mal joıyldy.
Qazir Jarqaıyń aýdanynda sanıtarııalyq-epıdemıologııalyq baqylaý, densaýlyq saqtaý, veterınarııalyq baqylaý jáne qadaǵalaý komıtetiniń aýmaqtyq ınspektsııasy, sondaı-aq veterınarııa basqarmasy qyzmetkerlerinen turatyn jumys toby bar. Barlyq tekserilgen oshaqta dezınfektsııa júrgizildi, ári qaraı zertteý úshin topyraq pen jer asty sýlarynyń synamalary alyndy.
«Aýylǵa 1,7 myńnan astam doza vaktsına jáne 900 000 ml dezınfektsııalaý quraldary, sondaı-aq oshaqty tekserý jáne joıý úshin qajetti barlyq arnaıy tehnıka jetkizildi. Jergilikti jerde «Respýblıkalyq epızootııaǵa qarsy jasaq» RMM-niń 9 mamany jumys istep jatyr. Zalaldy baǵalaý jáne aýrýdan ólgen mal úshin ótemaqy tóleý jónindegi arnaıy komıssııa quryldy. Memlekettik organdar jaǵdaıdy baqylaýda ustap otyr», - dep tolyqtyrdy vedomstvodan.
Eske sala ketsek, budan buryn turǵyndary túıneme juqtyrǵan Aqmola oblysyndaǵy Úshqarasý aýylda karantın jarııalanǵanyn jazǵan edik.