Turǵyndar túıneme juqtyrdy: Aqmola oblysyndaǵy aýylda karantın jarııalandy
Vedomstvo dereginshe, 2023 jyldyń 28 tamyzynda Aqmola oblysynyń Sanıtarııalyq-epıdemıologııalyq baqylaý departamentinen Jarqaıyń aýdanyndaǵy JShS jumysshylary «túınemege» shaldyqqandyǵy týraly habar túsken.
JShS dırektorynyń aıtýynsha, 32 bas iri qara mal qyrylǵan. Ólgen mal joıyldy, al eti komıssııalyq túrde tárkilendi.
«Esil aýdandyq aýrýhanasynyń juqpaly aýrýlar bólimshesine 12 adam jatqyzyldy. Sonymen birge, baılanysta bolǵan 22 adam anyqtalyp, olar Jarqaıyń aýdandyq aýrýhanasynyń medıtsına qyzmetkerleriniń baqylaýyna alyndy. Klınıkalyq kórinisi men zerthanalyq málimetteri boıynsha «túıneme» dıagnozy qoıyldy. Naýqastar klınıkalyq hattamaǵa sáıkes em qabyldaıdy, detoksıkatsııa terapııasy, antıbakterıaldy terapııa júrgiziledi», - dedi vedomstvodan.
Veterınarııa basqarmasynan atap ótkendeı, sanıtarııalyq qyzmet epıdemııaǵa qarsy is-sharalar ótkizip jatyr. Aýdannyń bas memlekettik sanıtarııalyq dárigeriniń qaýlysyna sáıkes baılanysta bolǵan adamdarǵa medıtsınalyq baqylaý ornatyldy.
Dezınfektsııa barlyq tekserilgen oshaqtarda júrgizildi.
«Oqıǵa ornynda SES, densaýlyq saqtaý mamandary, sondaı-aq Veterınarııalyq baqylaý komıtetiniń aýmaqtyq ınspektsııasy men veterınarııa basqarmasynyń qyzmetkerlerinen quralǵan top jumys istep jatyr. Erteń Úshqarasý aýylynyń aýmaǵynda karantın jarııalanady. Infektsııa oshaǵyn joıý boıynsha jumystar júrgizilýde. Aýylsharýashylyq ónimderin tasymaldaýdy shekteý maqsatynda aýdandyq polıtsııa bólimi Úshqarasý aýylyna beketter ornatty. Aýyl mańyna polıtsııa narıadtary qoıylyp, kirip, shyǵatyn kólikter men adamdardy tirkep jatyr», - dep tolyqtyrdy vedomstvodan.
Aıta ketsek, budan buryn Aqmola oblysyndaǵy aýyl brýtsellezge baılanysty karantınge jabylǵanyn jazǵan edik.