Turǵyndar sany azaıǵan aýyldarǵa ákimdikter qoldaý kórsetýi kerek - mınıstr

ASTANA. QazAqparat - Ulttyq ekonomıka mınıstri Álibek Qýantyrov perspektıvasy tómen aýyldardyń turǵyndaryn damý múmkindigi joǵary eldi mekenderge kóshirý múmkindigine qatysty pikir bildirdi, dep habarlaıdy QazAqparat tilshisi.

«Aımaqtyq standarttar júıesi bar. Onda sapa máselesi eskerilgen. Biz perspektıvasy bar aýyldardyń deńgeıin kóterýimiz kerek. Bul turǵyda ınfraqurylym, joldar jáne basqa da máseleler qamtylyp otyr. Atap aıtqanda, osy baǵytta tirek ári spýtnık aýyldar qarastyrylǵan, ıaǵnı olardyń sany 3,5 myńǵa jetti», - dedi Álibek Qýantyrov Astana halyqaralyq forýmy aıasynda ótken brıfıngide.

Onyń aıtýynsha, shaǵyn aýyldarǵa qoldaý kórsetý máselesine ákimdikter erekshe mán berýi kerek.

«Keıbir eldi mekennen turǵyndar qonys aýdaryp jatqanyn baıqalyp otyr, ıaǵnı kóbine jastardyń ketip jatqany belgili. Jaqyn ornalasqan keıbir eldi mekender aýyldyq okrýgterge biriktirilip jatyr. Biz iri aýyldardy tıisti standarttarǵa jetkizemiz, sondaı-aq shaǵyn aýyldarǵa da nazar aýdaramyz. Ákimdikter turǵyndary azaıǵan aýyldarǵa qoldaý kórsetýi kerek», - dedi mınıstr.

Sonymen qatar ol shekara mańyndaǵy aýyldarǵa erekshe nazar aýdarý kerek ekenin aıtty.

«Bul eldi mekenderdi barynsha adamı kapıtalmen tolyqtyrý mańyzdy, jumys oryndaryn qurý qajet. Bul kúrdeli másele», - dedi Ulttyq ekonomıka mınıstri.