Turǵyndar «QazMunaıGaz» kompanııasynyń atyn jamylǵan alaıaqtarǵa aldanyp jatyr

PETROPAVL. QazAqparat – Soltústik Qazaqstan oblysynda qarjy saýattylyǵynyń jetispeýinen alaıaqtardan zardap shegetinder qatary kóbeıgen, dep habarlaıdy QazAqparat tilshisi.

Óńirlik kommýnıkatsııalar qyzmetinde «Internettegi alaıaqtyqtyń jańa túrleri» taqyrybynda baspasóz konferentsııasy ótti. Polıtseıler qylmystyń bul túrimen kúreskenimen, aldyn alý jumystaryn júrgizgenimen, zardap shegýshiler azaıar emes. Bıyl jyl basynan osyndaı 259 derek tirkeldi.

Tártip saqshylarynyń aıtýynsha, jelilik alaıaqtar sońǵy kezde halyqtyń qarjy saýatsyzdyǵyn paıdalanatyn bolǵan. Olar tanymal beıne-hostıngter men áleýmettik jelilerde jeńil aqsha tabýǵa bolatyn túrli jobalarmen qyzyqtyrady.

Máselen, YouTube beınehostınginde «QazMunaıGaz» kompanııasynyń ınvestıtsııalyq qorynda tabys tabýǵa shaqyrǵan habarlandyrýdy kórgen Petropavldyń 22 jastaǵy turǵyny bul múmkindikti paıdalanbaq bolǵan. Silteme boıynsha ótkennen keıin oǵan aty-jónin, abonenttik nómirin qaldyrý usynyldy. Birneshe kúnnen keıin jigitke belgisiz adam uıaly telefonyna qońyraý shalyp, ózin jarnama berýshimin dep tanystyryp, jumystyń mindeti – adamdardy krıptokontoraǵa tartý ekenin aıtqan. Al jobaǵa qatysý úshin jáne bırja arqyly krıptovalıýtamen jumysty bastaý úshin qarajat salýdy suraǵan. Osylaısha birneshe kún túrli syltaýmen aqsha sýyrtpaqtap otyrǵan. Saldarynan jábirlenýshi 700 000 teńgeden aıyrylyp, keıin polıtsııaǵa júgindi.

Al Petropavl qalasynyń 50 jastaǵy turǵyny ınternette bırjada tabys tabý týraly habarlandyrýdy kórgen. Habarlamada ol jeke málimetterin qaldyryp, birneshe kúnnen keıin oǵan belgisiz er adam qońyraý shalǵan. Munaı kompanııasynda «aqsha tabýdyń» sharttaryn túsindirgen. Brokerlik platformaǵa kirý úshin dep qarajat salǵyzyp, keıin birneshe ret qarjy aýdartqan. Odan soń jınalǵan aqshany alý úshin saqtandyrý tólemin jasaý qajettigin aıtqan. Aqsha aýdarylǵannan keıin «jumys berýshiler» baılanysqa shyǵýdy toqtatty. Osylaısha áıel 1,5 mln teńgesinen aıyryldy.

Barlyq jaǵdaıda zardap shegýshiler qarjysyn úshinshi bireýlerdiń banktik esepshotyna aýdaryp otyrǵan. Alaıaqtar tanymal messendjerler arqyly bank kartalaryn satyp alý jáne aqshany qolma-qolǵa aýdarý týraly habarlandyrý beredi. Polıtseılerdiń aıtýynsha, qylmyskerlerge aqshany alýǵa kómektesetin «dropptar» keıin zardap shegýshige tolyq mólsherde keltirilgen shyǵyndy sot arqyly qaıtarady.