Turǵyn úılerdi jańǵyrtýǵa bıýdjetten qarajat bólinbeıdi
«Jóndeý jumystaryna bólingen qarajattyń shamamen 50 paıyzy qaıtarylady», - dedi «Turǵyn úı kommýnaldyq sharýashylyǵyn jańǵyrtý men damytýdyń qazaqstandyq ortalyǵy» AQ Turǵyn úı sharýashylyǵy departamentiniń dırektory Madına Mýrsakına jýrnalısterge bergen suhbatynda.
Departament basshysy keltirgen derekterge sáıkes, 2011-2015 jyldary Qazaqstandaǵy kóppáterli turǵyn úılerdi jańǵyrtýǵa memleket 33 mlrd teńge bólgen, shamamen 2660 úıge jóndeý jumystary júrgizilgen. Alaıda, qazirgi ýaqytta bıýdjettik qarajat bólinbeıdi jáne úılerdi jańǵyrtý boıynsha jumystardy qarjylandyrý ár óńirdiń «qaıtarylatyn qarajatyna» baılanysty júrgiziledi.
«Jańǵyrtý jumystary qaıtarylatyn qarajatqa baılanysty júrgiziledi. Ázirge jóndeý jumystary ár óńirde jyl saıyn 3-4 úıge ǵana júrgiziledi», - dep atap ótti ol.
M.Mýrsakınanyń aıtýynsha, kóp qabatty turǵyn úılerdi jańǵyrtý baǵdarlamasyn júzege asyrý 2011 jyly bastaldy. Ol jyldary baǵdarlamanyń tetigin eshkim túsingen joq jáne oǵan qatysýǵa turǵyndardyń barlyǵy daıyn bolmady.
«Qazir kerisinshe, barlyq turǵyndar osy baǵdarlamaǵa qatysqysy keledi. Biraq búgingi tańda qarjylandyrý aıaqtaldy - endi tek qaıtarylatyn qarajatqa ǵana senim artýǵa bolady. Eger úı ákimdik tizimine ense ǵana jóndeý jumystary júrgiziledi», - dedi M.Mýrsakına.
Qazirgi ýaqytta jalpy turǵyn úı qorynyń shamamen 26%-y kúrdeli jóndeý jumystaryn qajet etedi. Kópqabatty úılerdiń baspana qorynda kirpish, paneldi jáne bloktan turǵyzylǵan 78 402 úı bar.
Aıta keteıik, Astanada «Turǵyn úı kommýnaldy sharýashylyǵy - EKSPO jáne Qurylys 2017 » taqyrybyndaǵy H halyqaralyq forým bastaldy. On jyl boıy úzdiksiz uıymdastyrylyp kele jatqan bul jıynda turǵyn úı kommýnaldy sharýashylyǵy men qurylys máseleleri talqylanyp, sala mamandarynyń jańa tehnıkalyq jáne tehnologııalyq sheshimderi tanystyrylady.