Turǵyn úıdiń tyǵyz salynýy, sý máselesi: Turǵyndar senator Andreı Lýkınge shaǵymyn jetkizdi

ASTANA. QazAqparat – Parlament Senatynyń depýtaty Andreı Lýkın elorda aýdandary turǵyndary jáne ákimdik ókilderimen kezdesti, dep habarlaıdy QazAqparat Senattyń baspasóz qyzmetine silteme jasap.

Ákimdik ókilderi kezdesýde 2023 jyldyń birinshi jartyjyldyǵynyń qorytyndysy boıynsha atqarylǵan jumystar týraly aıtyp berdi.

Depýtat bıýdjettik baǵdarlamalardy iske asyrýdaǵy 2023 jylǵy 1 shildedegi jaǵdaı boıynsha esepterdi, sondaı-aq 2023-2025 jyldarǵa josparlanǵan shyǵystar týraly aqparatty da tyńdady.

Depýtatpen jáne ákimdik ókilderimen pikirlesýge qala, aýdan turǵyndary qatysty. Azamattardy qyzyqtyrǵan máselelerdiń qatarynda turǵyn úı saıasaty, atap aıtqanda, kóppáterli turǵyn úıler qurylysynyń tyǵyzdyǵy jáne turǵyn úı keshenderindegi sý qysymnyń azaıýy men sýdyń múldem bolmaýy týraly boldy.

Senator óz kezeginde parlamentshiler aıtylǵan barlyq máseleni nazarda ustaıtynyn aıta kelip, Senattyń ótken sessııadaǵy jumysynyń qorytyndysy týraly habardar etti.

«Parlament VIII shaqyrylymnyń I sessııasy barysynda jalpy alǵanda 25 zańnamalyq akti qabyldady. Onyń ishinde elimiz ben halyq úshin asa mańyzdy «Zańsyz ıemdenilgen aktıvterdi memleketke qaıtarý týraly» zań qabyldandy. Ol Qazaqstan aýmaǵynda da, odan tys jerlerde de zańsyz satyp alynǵan aktıvterdi qaıtarýǵa, sondaı-aq elimizdiń zańnamasyndaǵy múlikti zańsyz satyp alý men qarjyny shyǵarýǵa yqpal etken jaǵdaılardy joıýǵa múmkindik beredi», - dep atap ótti senator.