Turǵyn úıdiń lıftin aıaqpen teýip shaqyrǵan astanalyq feldsherge aıyppul salyndy

NUR-SULTAN. QazAqparat – Elordadaǵy turǵyn úılerdiń birinde lıft batyrmasyn aıaqpen teýip basqan feldsherge 5 AEK kóleminde aıyppul salyndy, dep habarlaıdy QazAqparat tilshisi.

Bul týraly Nur-Sultan qalasy polıtsııa departamentiniń baspasóz qyzmeti málim etti.

«Áleýmettik jelilerge monıtorıng júrgizý barysynda jedel járdem qyzmetkeriniń kıimin kıgen adamnyń «Aq dıdar» turǵyn úı kesheninde lıft panelin aıaqpen basyp, lıft shaqyrǵan vıdeosy tabyldy.

Polıtseıler vıdeodaǵy jigittiń 24 jastaǵy feldsher ekenin anyqtady.

Onyń ústinen QR Ákimshilik quqyq buzý týraly kodekstiń 434-baby (usaq buzaqylyq) boıynsha ákimshilik is qozǵaldy. Mamandandyrylǵan aýdanaralyq ákimshilik sottyń sheshimi boıynsha tártip buzýshyǵa 5 AEK (15 315 teńge – red.) kóleminde aıyppul salyndy», - dep jazylǵan málimette.

Nur-Sultan qalasynyń polıtsııa departamenti turǵyn úı-jaılardy búldirý jáne aınaladaǵylarǵa qurmet bildirmeý, qoǵamdyq tártipti buzatyn basqa da áreketter jaýapkershilik arqalatatynyn eskertip otyr.