Turǵyn úıdi jańǵyrtý baǵdarlamasy aıasynda bıyl 140 úı jóndeýden ótedi

ASTANA. QazAqparat - Turǵyn úıdi jańǵyrtý baǵdarlamasy aıasynda bıyl 140 úı jóndeýden ótedi. Bul týraly búgin Májiliste «Nur Otan» parlamenttik fraktsııasy janyndaǵy Óńirlik saıasat jáne máslıhattarmen jumys jónindegi keńestiń keńeıtilgen otyrysynda Ulttyq ekonomıka vıtse-mınıstri Qaıyrbek Óskenbaev málim etti. Eske salaıyq, jıynda elimizdegi turǵyn úı-kommýnaldyq sharýashylyǵyn jańǵyrtý barysy talqylanǵan bolatyn.

Vıtse-mınıstrdiń aıtýynsha, 2011-2012 jyldar aralyǵynda turǵyn úı kommýnaldyq sharýashylyǵyn jańǵyrtý baǵdarlamasyna bıýdjetten 17 mlrd. 842 mln. teńge bólingen. Osy qarajat boıynsha 2013-2014 jyldary kúrdeli jóndeý jumystary atqarylýy tıis bolatyn. 2014 jylǵy 10 qazandaǵy jaǵdaı boıynsha jergilikti atqarýshy organdar 17 mlrd. 779 mln. teńgeni ıgergen.

«Búgingi tańda kúrdeli jóndeýi josparlanǵan 1 360 kóppáterli turǵyn úıdiń 1 352-isinde jumystar aıaqtaldy, qalǵan 8 úıde jalǵasýda. Al 2014 jyly respýblıkalyq bıýdjetten 11 mlrd. 847,9 mln. teńge bólinip, oǵan 698 turǵyn úıge jóndeý jumystary belgilengen. Qazirgi tańda 140 úıde kúrdeli jóndeý jumystary aıaqtaldy», - deıdi Q. Óskenbaev.

Onyń sózine qaraǵanda, 2014 jylǵy 10 qazandaǵy jaǵdaı boıynsha qarajattardyń qaıtarylýy 2 mlrd. 659 mln. teńgeni quraıdy. Qaıtarylǵan qarajattar esebinen 105 turǵyn úı jóndelse, sonyń ishinde aǵymdaǵy jyly 24 úıge 315 mln. teńgeniń jóndeý jumystary júzege asqan.