Turǵyn úı, jumyssyzdyq, aýyz sý: depýtattar Túrkistan oblysyndaǵy ózekti máselelermen tanysty

TÚRKІSTAN. QazAqparat - Qazaqstan Respýblıkasy Parlamenti Májilisiniń depýtattary bir aptadan astam ýaqyt boıy Túrkistan oblysynyń turǵyndarmen kezdesip, ótinishteri men usynystaryn tyńdady, dep habarlaıdy QazAqparat tilshisi.

Oblys turǵyndary negizinen áleýmettik jaǵdaı, turǵyn úı, jumyssyzdyq, aǵyn sý, aýyz sý, jer telimderi, aýyl sharýashylyǵyna arnalǵan sýbsıdııa, kásipkerlikke qoldaý kórsetý máselelerin qozǵaǵan.

«Nur Otan» partııasy Túrkistan oblystyq fılıaly tóraǵasynyń birinshi orynbasary Beısen Tájibaevtyń aıtýynsha, depýtattar 16 aqpannan beri Túrkistan oblysynyń 17 aýdan, qalasynda jumys saparymen bolyp, 136 aýyl, eldi mekende elmen júzdesken. Sonymen qatar 16 qoǵamdyq qabyldaý ótkizip, oblys turǵyndarynyń 150-den asa aryz-ótinishterin tyńdaǵan.

Búgin oblys ákimi Ómirzaq Shókeevpen kezdesken Májilis depýtattary Túrkistan oblysynda atqarylyp jatqan jumystardy, Túrkistan qalasyndaǵy ózgeristerdi joǵary baǵalady. Ózekti túıtkilderdi parlamenttik deńgeıde kóterip, oblysty damytý jolynda birlese jumys atqaratyndaryn jetkizdi. Óńir basshysy Túrkistan oblysynda atqarylyp jatqan jumystar jóninde baıandap, máselelerdi de talqylady.

– Qazirgi tańda Túrkistandy damytý josparynyń ekinshi kezeńi júzege asyrylyp jatyr. Basym bóligi – jeke ınvestıtsııalar. Demografııalyq ósim joǵary. Sondyqtan elimizde salynyp jatqan mektepterdiń 25 paıyzdaıy Túrkistan oblysynda boı kóterýde. Oblysta ınfraqurylymdy jaqsartý, aýyl sharýashylyǵyn damytý, aǵyn sý máselesin sheshý, sý qoımalardy kóbeıtý baǵytynda júıeli jumystar atqarylyp keledi. Ár aýdan, qalanyń kórsetkishterin saraptap, ózekti máselelerin anyqtap, olardy sheshý boıynsha tıisti jumystar júrgizip jatyrmyz, – dedi Ó.Shókeev.