Turǵyn úı jaldaý sýbsıdııasynyń bir bóligi jergilikti bıýdjetten tólenedi

NUR-SULTAN. QazAqparat – Turǵyn úı jaldaý sýbsıdııasyna muqtaj adamdardy qoldaý úshin jylyna bıýdjetten 50 mlrd teńge kóleminde qarjy jumsalmaq. Bul somanyń 10 mlrd teńgesin jergilikti bıýdjetter bólýi kerek, dep habarlaıdy QazAqparat tilshisi.

Úkimet otyrysynda QR Indýstrııa jáne ınfraqurylymdyq damý mınıstri Qaıyrbek Óskenbaev osyndaı málimet aıtty.

«Jyl saıyn respýblıkalyq bıýdjetten shyǵyndar – 40 mlrd teńgeni jáne jergilikti bıýdjetter úshin – 10 mlrd teńgeni quraıdy», - dedi ol.

Mınıstrdiń málimeti boıynsha, turǵyn úı tólemderi baǵdarlamasyn tolyq iske qosý mamyr aıyna josparlanǵan.

«Joǵaryda kórsetilgen tásilder maquldanǵan jaǵdaıda, mınıstrlik óz buıryǵyn erteń bekitýge daıyn», - dedi Qaıyrbek Óskenbaev.

Aıta keteıik, mınıstrdiń málimeti boıynsha, baspana jaldaý aqysynyń 50 paıyzyn memleket tóleıdi.

Jaldaý aqysy mynadaı tártippen sýbsıdııalanbaq: - 50 % memlekettik sýbsıdııalar esebinen jabylady; - qalǵan 50 % alýshy óz betinshe tóleıdi. «70 myń azamatqa qoldaý kórsetý úshin 50 mlrd teńge qajet, bul rette kórsetilgen qarajat jyl saıyn kezekte turǵan adamdar sanyna baılanysty ózgerýi múmkin», - dedi vedomstvo basshysy.