Turǵyn úı naryǵynda saýda kólemi tómendedi
2023 jylǵy qańtar aıynda turǵyn úıdi satyp alý-satý boıynsha 24 294 mámile tirkelgen, onyń ishinde jeke úıler boıynsha 5 879 jáne kóppáterli úılerdegi páterler boıynsha 18 415 mámile jasaldy. Aldyńǵy aımen (33 587) salystyrǵanda turǵyn úıdi satyp alý-satý mámileleriniń sany 27,7%-ǵa azaıdy. Mámileler sany boıynsha Almaty (5 599 – 23,0%) jáne Astana (4 040 – 16,6%) qalalary áli de kósh bastap tur. Mámileler sany Ulytaý oblysynda eń az – 285 (1,2%).
2022 jyldyń jeltoqsan aıymen salystyrǵanda 2023 jyldyń qańtarynda mámile boıynsha teris kórsetkish Qazaqstannyń barlyq aımaǵynda baıqaldy. Bir aıdaǵy eń úlken tómendeý Túrkistan (-43,1%), Abaı (-42,0%) jáne Aqmola (-41,5%) oblystarynda boldy.
2022 jyldyń jeltoqsanymen salystyrǵanda kóppáterli úılerdegi turǵyn úı mámileleriniń sany 7 618-ge azaıǵan, olar boıynsha qańtar aıynda barlyǵy 18 415 mámile jasaldy, bul – mámilelerdiń jalpy sanynyń 75,8%-y. Bólmeler sany boıynsha 1 bólmeli páterler satylymy basym. Qańtar aıynda olardyń 7 586-y resimdeldi, saýdanyń negizgi úlesi Almaty jáne Astana qalalaryna (63,4%) tıesili. 2 bólmeli páter boıynsha 6 214 mámile jasaldy.
2022 jyldyń jeltoqsanymen salystyrǵanda jeke turǵyn úıler boıynsha mámileler sany 22,2%-ǵa (1 675 mámilege) azaıyp, 5 879-dy quraǵan. Sonymen qatar, azaıý elimizdiń barlyq aımaǵynda baıqaldy.
2023 jyldyń qańtarynda turǵyn úıdi satyp alý-satý mámileleri byltyrǵy tıisti aıymen salystyrǵanda 27,2%-ǵa azaıǵan, ol kezde 33 365 mámile resimdelgen bolatyn (2021 j. qańtar – 21 577). Osylaısha, teris kórsetkish barlyq derlik aımaqta tirkeldi. Turǵyn úıdi alyp-satý boıynsha aıtarlyqtaı turaqtylyq Astana qalasynda baıqaldy, munda tómendeý ne bári – 0,8%. Al, oń dınamıka tek Almatyda tirkeldi, ósim – 34,1%.