Turǵyn úı qurylysyna úlestik qatysý zańnamasyn elemeı júrgen kompanııalar bar - ákimdik

ASTANA. QazAqparat - Elordadaǵy Qalalyq orta sapasy jáne baqylaý basqarmasynyń basshysy Dáýlet Dosqulov úleskerler qarajatyna salynǵan turǵyn úı qurylysynyń jaǵdaıy týraly aıtyp berdi, dep habarlaıdy QazAqparat tilshisi.

«Memlekettik baqylaýdy júzege asyrý nátıjesinde, 2018 jyldan qazirge deıingi kezeńde jalpy somasy 79 mln teńgeden astam somaǵa 136 qurylys uıymy ákimshilik jaýapkershilikke tartyldy. Sondaı-aq prokýratýra organdarymen birlesip qurylys salýshylardyń áreketin zańsyz dep taný jáne qyzmetin úlestik qatysý týraly zańnamaǵa sáıkes keltirý boıynsha sot organdaryna talap-aryzdardy berý tetikteri ázirlendi», - dedi D. Dosqulov Astana qalasy Qoǵamdyq keńesiniń otyrysynda.

Onyń aıtýynsha, tıisti ózgerister engizý maqsatynda ákimdik ýákiletti memlekettik organdarǵa úlestik qatysý týraly zańdy buzǵany úshin jaýapkershilikti kúsheıtý, sondaı-aq birqatar qosymsha baqylaý sharalaryn qamtýǵa qatysty usynystar joldady.

«Turǵyn úı qurylysyna úleskerlerden aqsha tartýdy retteıtin normalar qazirgi jaǵdaıǵa sáıkes kelmeıdi jáne tıisti deńgeıde júzege asyrylmaı jatyr», - dedi basqarma basshysy.

Osy oraıda ol qurylys nysandaryn salyp jatqan kompanııalar atalǵan zań talaptaryn buzý áreketterine áli de baryp jatqanyn aıtty.

Budan buryn habarlanǵandaı, elordada qurylysy uzaqqa sozylǵan turǵyn úıler qashan tapsyrylatyny nyqtylandy.

2019 jyldan qazirge deıingi kezeńde 120 turǵyn úıdiń qurylysy aıaqtalyp, 14 myńnan astam otbasy baspanaly boldy. Qalǵan 30 úı 2023 jyly jáne 2024 jyldyń basynda aıaqtalady dep josparlanǵan.