Turǵyn úı qurylysyna úlestik qatysý týraly zańnamaǵa ózgertýler engizilmek

NUR-SULTAN. QazAqparat – Turǵyn úı qurylysyna úleskerlik qatysý týraly zańnamany jetildirý qajet. Bul másele Indýstrııa jáne ınfraqurylymdyq damý mınıstrliginiń «Ashyq saǵat alańynda» talqylandy, dep habarlaıdy QazAqparat vedomstvonyń baspasóz qyzmetine silteme jasap.

Mınıstrlik pen «Qazaqstan Turǵyn úı kompanııasy» AQ ókilderi atalǵan zańnamaǵa engizilýi kózdelgen birqatar túzetýdi kópshilik nazaryna usyndy. Bul ózgerister qurylys salýshylar úshin úlestik qatysýdyń tartymdylyǵyn arttyrýǵa baǵyttalǵan.

QR IIDM Qala qurylysy jáne turǵyn úı-kommýnaldyq saıasaty departamentiniń dırektory Rýslan Lepesovtiń aıtýynsha, búginde kóptegen kompanııalar «Turǵyn úı qurylysyna úlestik qatysý týraly» zańdy óreskel buzyp, qurylys júrgizý barysynda halyqtyń qarajatyn paıdalanýdy ádetke aınaldyrǵan. Bul óz kezeginde qurylys nysandarynyń ýaqtyly aıaqtalmaýyna jáne merdiger kompanııalardyń kópshilik aldyndaǵy mindettemelerin der kezinde oryndamaýyna ákep soǵýy múmkin.

Al, «Qazaqstan Turǵyn úı kompanııasy» AQ Basqarma tóraǵasynyń orynbasary Oljas Salyqov turǵyn úı qurylysy naryǵyn demonopolızatsııalaý jáne atalǵan naryqqa qatysýshylar úshin túrli tosqaýyldardy azaıtýǵa baǵyttalǵan birqatar usynysty ortaǵa saldy.

Atap aıtqanda, turǵyn úı qurylysyndaǵy úleskerlik qatysý kezinde «Biryńǵaı operatordyń kepildemesin alǵan («QTK»)» qurylys kompanııalarynan talap etiletin qujattar tizimin azaıtý usynylyp otyr. Sonymen qatar, olardyń megapolıster men ózge aımaqtarda salǵan qurylys nysandarynyń aýmaǵy men osy saladaǵy tájirıbesi boıynsha shekti talaptardy azaıtý kózdelgen.

Máselen, «Ekinshi deńgeıli bank jobasyna qatysý tásilimen» turǵyn úı qurylysyna úlestik qatysý uıymdastyrylǵan jaǵdaıda nemese kóppáterli úı qańqasyn turǵyzǵannan keıin úlesker aqshasyn tartýǵa qatysty jergilikti atqarýshy organnyń ruqsat berý protsesin engizý qarastyrylyp otyr.

Al, «Kóppáterli turǵyn úıdiń qańqasy turǵyzylǵannan keıin úleskerlerdiń aqshasyn tartý tásilimen» turǵyn úı qurylysyna úlestik qatysýdy uıymdastyrý kezinde merdiger kompanııalardyń saladaǵy jıyntyq tájirıbesin 5 jyldan 3 jylǵa deıin tómendetý, Nur-Sultan, Almaty jáne Shymkent qalalarynda salǵan kóppáterli turǵyn úılerdiń jalpy aýmaǵyn 60 myń sharshy metrden 30 myń sharshy metrge, al aımaqtar úshin 30 myń sharshy metrden 18 myń sharshy metrge deıin azaıtý usynylady.

Aıtylǵan usynystar bıznes qaýymdastyq tarapynan qoldaý tapty.

Sondaı-aq, jıynda úleskerlik qurylys salasyndaǵy ózge de máselelerge nazar aýdaryldy.

Basqosý sońynda qarastyrylǵan máseleler men usynystar boıynsha sheshim qabyldanyp, taraptar jýyrda osyǵan oraı arnaıy talqylaý ótkizýge ýaǵdalasty.

Aıta ketsek, beınebaılanys rejıminde uıymdastyrylǵan basqosýǵa mınıstrlik ókilderi men «Qazaqstan Turǵyn úı kompanııasy» AQ, «Atameken» UKP, «Qazaqstan qurylysshylar odaǵy» RZTB jáne qurylys kompanııalarynyń basshylary qatysty.