«Turǵyn úı qurylys jınaq bankinde» kúndelikti ashylatyn depozıtter kólemi 3 ese artqan

ASTANA. QazAqparat - «Qazaqstannyń Turǵyn úı qurylys jınaq banki» AQ 3 sáýirden bastap depozıt ashýǵa jáne kelisim-shart somasyn ulǵaıtýǵa taǵaıyndalǵan komıssııa kólemin 0 teńge qylyp bekitkennen beri jańadan ashylǵan jınaq salymdarynyń sany kúrt artty. Bul týraly banktiń baspasóz qyzmeti habarlaıdy.

«Biz bul komıssııanyń psıhologııalyq jáne qarjylyq turǵyda óz klıentterimizge kedergi bolyp kelgenin jaqsy túsinemiz. Sondyqtan, sáýirden bastap komıssııa almaıtyn boldyq. Bul biz josparlaǵandaı tıimdi áserin berdi, ıaǵnı jańadan ashylyp jatqan depozıtter kólemi ósýde. Sonymen birge, komıssııanyń joıylýy belgili-bir merzimmen shekteletin naýqan emes, bul turaqty túrde jumys isteıtin bolady», - deıdi Turǵyn úı qurylys jınaq bankiniń basqarma tóraıymy Lázzat Ibragımova.

Buryn atalǵan qyzmetter úshin komıssııalyq alymnyń mólsheri  sharttyq somanyń jáne depozıtti tolyqtyrý somasynyń 0,55%-yn quraǵan edi. Osyǵan baılanysty, kóptegen salymshylar depozıttiń sharttyq somasyn 1 mln. teńgeden asyrmaı kelgen. Al, bul óz kezeginde baspana alý úshin jetkiliksiz.

Eger, 2016 jyly kúndelikti orta eseppen 1 myń TQJ sharty jasalǵan bolsa, al aǵymdaǵy  jyldyń 3 sáýirinen bastap kúndelikti ashylǵan depozıtterdiń ortasha sany 2,9 myń birlikti qurap otyr. Komıssııany alyp tastaǵan sátten bastap,  barlyǵy 50 myń depozıt ashylǵan.