Turǵyn úı qurylys jınaq banki Úkimettiń tıisti Qaýlysynan keıin azamattardyń salymdaryn óteıtin bolady
«Bank Úkimet Qaýlysyn, ıaǵnı resmı qujatty kútip otyr. Sol kezde ǵana biz ótemaqy tóleýdiń naqty tetikteri týraly aıta alamyz», - dep atap ótti TQJB ókilderi.
«Teńge baǵamynyń túzetilýinen keıin Memleket basshysy Úkimetke «Turǵyn úı qurylys jınaq banki» AQ salymshylarynyń qarajattaryn saqtaýdyń jeke tetikterin jasaýdy tapsyrǵan bolatyn. «Báıterek» basqarýshy holdıngi, Qarjy mınıstrligimen, Ekonomıka mınıstrligimen, Investıtsııalar jáne damý mınıstrligimen jáne QR Ulttyq bankimen birge valıýta baǵamynyń aıyrmasyn qaıtarýdyń utymdy tetikteri jasaldy. Aıta ketý kerek, salymnyń somasyna jáne kólemine shekteý qoımaıdy», - dep atap kórsetilgen «QazAqparat» agenttigine berilgen jaýapta.
Banktiń habarlaýynsha, «Turǵyn úı qurylys jınaq banki» AQ salymshylaryna shyǵyndy óteý týraly sheshim 2015 jyly qabyldanǵan. TQJB salymshylaryna valıýta baǵamynyń aıyrmasyn qaıtarý úshin bıýdjet qorynan 36,9 mlrd. teńge qarastyrylǵan.
Bunyń aldynda Ekonomıka mınıstri Erbolat Dosaevtyń málim etkenindeı, 20,9 mlrd. teńgelik alǵashqy transh 2016 jyly bólinedi. Qalǵan 16 mlrd. teńge 2017 jyly úlestiriledi dep josparlanýda. Sonymen qatar salymshylarǵa shyǵyndy óteýdi «Turǵyn úı qurylys jınaq banki» AQ óz qarajattary esebinen qarastyryp otyr.
«Bank salymshylarymen qosymsha kelisimshart jasaý boıynsha jumystar Úkimettiń qarajatty bólý týraly tıisti Qaýlysynan keıin bastalady. Qujattardy qabyldaý merzimi men naqty ýaqyty týraly aqparat salymshylarǵa habarlanatyn bolady. Tıisti habarlamalar Turǵyn úı qurylys jınaq bankiniń saıtynda jáne BAQ-ta jarııalanady», - delingen banktiń resmı jaýabynda.
TQJB baspasóz qyzmetiniń málimetteri boıynsha, valıýta baǵamynyń aıyrmasyn óteý salymshylardyń óz mindettemelerin uqypty oryndaǵan jaǵdaıda, sonymen qatar depozıttiń bir jyl kóleminde saqtalǵanda ǵana oryn alady.