Turǵyn úı kooperatıvteriniń qyzmetin qatań reglamentteý qajet – Májilis depýtaty
«Qazirgi ýaqytta Qazaqstanda 1 827 túrli tutyný kooperatıvi tirkelgen. Biraq azamattardyń shaǵymdary kóbine turǵyn úı tutyný kooperatıvteriniń áreketine túsedi. Búgingi tańda quqyq qorǵaý organdary qarjy pıramıdasyn qurý faktileri boıynsha kóptegen is tergeýde. Onyń ishinde respýblıka «Novyı dom 2017», «Svoı dom», «Best Veı-Nedvıjımost», «Shańyraq KTK», «Otan stroı» sııaqty óndiristik kooperatıvter nazarǵa erkeshe túsedi. Olardyń jalpy zalal somasy - 200 mln teńgeden asady. Bul - qylmystyq is qozǵalǵan turǵyn úı kooperatıvteriniń tolyq emes tizimi. Biraq kóbine quqyq qorǵaý organdary aktsıonerler men kooperatıvterdiń quqyqtyq qatynastarynyń azamattyq-quqyqtyq sıpatyna silteme jasaı otyryp, mundaı jaǵdaılardy tergeýden bas tartady», - dedi búgin Májilistiń jalpy otyrysynda QR Premer-Mınıstriniń orynbasary Roman Sklıarǵa depýtattyq saýal joldaǵan Faızolla Kamenov.
Onyń atap ótýinshe, mundaı uıymdarǵa ýákiletti organdar tarapynan tıisti baqylaý júrgizilmeıdi.
Tutyný kooperatıvterin qurý aıtarlyqtaı jeńil, biraq osy oraıda azamattardyń óz aqshasyn joǵaltyp alýy sekildi saldar áli de memlekettiń problemasyna aınalyp otyr.
«Osy depýtattyq saýalmen turǵyn úı satyp alý úshin azamattardyń qarajatyn tikeleı nemese janama túrde tartatyn barlyq osyndaı kooperatıvterdiń qyzmetin qatań túrde reglamentteý qajet ekendigin suraımyz. Al aldanǵan turǵyn úı salymshylary sanynyń ósýine jol bermeý maqsatynda Úkimetke mynadaı is-sharalardy qabyldaýdy usynamyz: tutyný kooperatıvterin tıisinshe baqylaý jáne olardyń qyzmetin reglamentteý úshin memlekettik organdardyń úılestirýshisin aıqyndap berý; tutyný kooperatıvteri arqyly baspana satyp alý úshin aqsha qarajatyn salý qaýpi týraly azamattardy habardar etý», - dedi Májilis depýtaty.