Turǵyn úı-komýnaldyq sharýashylyǵyn jańǵyrtý baǵdarlamasyna senim joǵalyp barady - D. Nazarbaeva

ASTANA. QazAqparat - Azamattar tarapynan elimizde júzege asyp jatqan turǵyn úı-kommýnaldyq sharýashylyǵyn jańǵyrtý baǵdarlamasyna senim joǵalyp barady. Búgin Májilisindegi «Nur Otan» partııasy fraktsııasynyń janyndaǵy óńirlik saıasat jáne máslıhattarmen jumys jónindegi keńes otyrysynda Májilis tóraǵasynyń orynbasary, fraktsııa jetekshisi Darıǵa Nazarbaeva osylaı málimdedi.

Eske sala keteıik, jıynda elimizdegi turǵyn úı-kommýnaldyq sharýashylyǵyn jańǵyrtý barysy talqylanǵan bolatyn. «Jańǵyrtý baǵdarlamasyndaǵy kóptegen máseleler negizinen azamattardyń baǵdarlamaǵa senimimen tyǵyz baılanysty edi, al bundaı senim joǵalyp barady. Týyndaǵan máseleler de osynda jatyr. Óıtkeni, jóndeý jumystarynyń sapasy syn kótermeıdi. Sondyq, budan keıin halyqty baǵdarlamaǵa qalaı tartýǵa bolady?» - dedi jıynda sóz sóılegen vıtse-spıker. Onyń sózine qaraǵanda, baǵdarlamada ókiletti organnyń barlyq erejeler men normatıvterdi, talaptardy belgilemeýi birshama problemalar týdyrǵan. Sondyqtan da, fraktsııa jetekshisi barlyq jaǵdaılar eskerilýi tıistigin, azamattar áli ózdiginen basqarýǵa daıyn emestigin alǵa tartty.

«Algorıtmdi, standarttar men normatıvterdi anyqtaý qajet. Al bundaı shara negizinen turǵyndardyń óz mindetin adal oryndamaǵan merdigerlerge táýeldi bolmaýy úshin jasalýy shart. Eger kelisim boıynsha merdiger óz mindetin oryndamasa, sodan suraý bolýy kerek. Biraq, búgin jaýap berip jatqan eshkimdi kórmeımiz», - dedi D. Nazarbaeva.