Turǵyn úı-kommýnaldyq sharýashylyq salasy ózgeriske ushyraıdy
Búginde turǵyn úıdi basqarý ashyqtyǵy men turǵyn úı-kommýnaldyq sharýashylyǵy týraly zańnama Parlament Májilisiniń qaraýyna engizildi.
Mınıstrliktiń buıryǵymen 55 adamnan turatyn jumys toby atalǵan zań jobasynyń 3 kodeksi jáne 12 tarmaǵyna ózgeris engizdi.
«Búgingi kúni elimizde atalǵan qyzmettiń tolyǵymen ashyq bolmaýyna, turǵyndardyń kóppáterli turǵyn úıge qyzmet kórsetý sapasyna kóńilderiniń tolmaýy boıynsha problemalar bar ekeni jasyryn emes. PIK-ke senimniń tómendeýine baılanysty, páter ıeleriniń kúrdeli jóndeý jumystaryn júrgizý úshin qarajat jınaýǵa qulqy joqtyǵyda baıqalady. Sonymen qatar, qazirgi kezde PIK kóp úıge qyzmet kórsetetindikten barlyq úıge bir shot ashady, bul da jınalǵan qarajattyn maqsatty paıdalanýyn baqylaýǵa múmkindik bermeıdi. Jańa zań jobasynyń negizgi usynysy - kóppáterli turǵyn úıdi basqarý úshin «bir úı-bir múliktin menshik ıeleriniń birlestigi - bir shot» prıntsıpi boıynsha jumys isteıtin «múliktiń menshik ıeleriniń birlestigi» jańa kommertsııalyq emes uıymyn qurý», -dedi QR Indýstrııa jáne ınfraqurylymdyq damý mınıstrligi Qurylys salasyn jáne turǵyn úı-kommýnaldyq sharýashylyǵyn damytý departamenti dırektorynyń orynbasary Marǵulan Ábdikárimov OKQ-de ótken baspasóz máslıhatynda.
Onyń aıtýynsha, eger turǵyn úıdegi páterler men turǵyn emes úı-jaılardyń sany onnan aspasa, menshik ıeleri zańdy tulǵa qurmaı tikeleı birlesip basqarýyna (seriktestik) jol beriledi.
«Jergilikti atqarýshy organ óziniń saıtynda jáne turǵyn úı-kommýnaldyq sharýashylyǵynyń biryńǵaı aqparattyq júıesinde quryltaı jınalysyn ótkizý týraly habarlamany ornalastyrady. Turǵyn úıdiń páterler men turǵyn emes úı-jaılardyń menshik ıeleriniń birinshi jınalysymen múliktiń menshik ıeleriniń birlestigin tirkeý týraly sheshimdi qabyldaý jáne onyń atqarýshy organnyń birinshi quramyn saılaý týraly quryltaı jıynyn ótkizedi. Sáıkesinshe turǵyndar arasynan tóraǵa/basqarma jáne úı keńesi (tekserý komıssııasy) saılanady. Quryltaı jınalysynyń qorytyndysy boıynsha quzyrly organdarǵa «múliktiń menshik ıeleriniń birlestigi» jańa kommertsııalyq emes uıymyn qurý týraly ótinishpen qosa hattama tapsyrylady», - dedi ol.
Jańa zań jobasyndaǵy ózgeristerge sáıkes el aýmaǵynda 190 kóppáterli turǵyn úı, 28 PIK jáne 51 tabıǵı monopolııa sýbektileri iriktelip alynyp, pılottyq joba retinde júzege asyrylýda.
Mınıstrliktiń deregine súıensek, qazirgi ýaqytta elimizde turǵyn úı-kommýnaldyq sharýashylyǵynyń jalpy sany 78 657 birlikti quraıdy, onyń ishinde 54 808 úı nemese 69,7% qanaǵattanarlyq jaǵdaıda. Kúrdeli jóndeýdi talap etetin úıler sany 19 639 quraıdy nemese 25 %. Apat jaǵdaıdaǵy 1 383 úı bar paıyzdyq kórsetkishi 1,8%.