Turǵyn úı-kommýnaldyq sharýashylyǵyn jańǵyrtý baǵdarlamasy toqtatylmaıdy - B. Saǵyntaev

ASTANA. 13 qarasha. QazAqparat - Turǵyn úı-kommýnaldyq sharýashylyǵyn jańǵyrtý baǵdarlamasy toqtatylmaıdy. Búgin Parlament Májilisiniń jalpy otyrysynda «2013-2015 jyldarǵa arnalǵan respýblıkalyq bıýdjet týraly» QR zańyna ózgerister men tolyqtyrýlar engizý týraly» zań jobasyn talqylaý barysynda QR Premer-Mınıstriniń birinshi orynbasary Baqytjan Saǵyntaev osylaı málim etti.

Zań jobasyn talqylaý barysynda depýtat Nurlan Jazylbekov turǵyn úı-kommýnaldyq sharýashylyǵyn jańǵyrtý jónindegi baǵdarlamany synǵa alǵan bolatyn. «Buǵan halyqtyń shaǵymy kún saıyn artyp keledi. 2011 jyly bul baǵdarlamaǵa bıýdjetten 10,5 mlrd. teńge bólinse, 2013 jyly óńirlerdegi qajettilik 26 mlrd. teńgeni quraǵanyna qaramastan, birde bir tıyn bólingen joq. 2014 jyly Úkimet 8 mlrd. teńge ǵana bóledi. Bul neni bildiredi? Atalmysh baǵdarlama kerek emes bolǵany ma?», - dep surady depýtat N. Jazylbekov.

Óz kezeginde Premer-Mınıstrdiń birinshi orynbasary baǵdarlamanyń bas kezinde kóptegen máseleler týyndaǵanyn, tipti turǵyndardy osy baǵdarlamaǵa qatysýǵa kóndirý jumystary da atqarylǵanyn tilge tıek etti. «Al baǵdarlama bastalǵanda oǵan jumsalatyn qarajattyń qaıtarymdylyǵyn qamtamasyz etetin birneshe tetikter qaraǵan edik. Biz sonyń tek bir tetigine ǵana toqtalatyn boldyq. Bıyl elimiz boıynsha jergilikti atqarýshy organdardan osy baǵdarlamaǵa qatysty kóptep qarajat surala bastaǵany da ras. Alaıda, bul máseleni zertteý barysynda biz sol turǵyndar tarapynan kóptegen suraqtarǵa tap boldyq jáne aldymen osy problemalardy sheship alýymyz kerek edi», - deıdi B. Saǵyntaev. Onyń aıtýynsha, búgingi kúni baǵdarlama toqtaǵan joq, qolǵa alynǵan barlyq jumystardy qarjylandyrý sharalary qamtylyp jatyr.

«Biz 2014 jylǵa 8 mlrd. teńge qarastyryp otyrmyz. Al sol qarajattyń ıgerilýine qaraı, keler jylǵy bıýdjetti naqtylaý barysynda osy máselege qaıta nazar aýdaratyn bolamyz», - dedi B.Saǵyntaev.