Turǵyn úı kezeginen negizsiz shyǵarylǵan: Qyzylordada múgedek jannyń quqyǵy qorǵaldy

<p>QYZYLORDA. KAZINFORM - Qyzylorda oblysynda sot belgisiz sebeppen turǵyn úı alý kezeginen shyǵarylǵan birinshi toptaǵy múmkindigi shekteýli turǵynyna qatysty aýdan ákiminiń tıisti qaýlysynyń kúshin joıdy.</p>

Múmkindigi shekteýli jan 2012 jyly memlekettik turǵyn úı qorynan turǵyn úı alý kezegine qoıylǵan. Alaıda eki jyldan keıin ol belgisiz sebeptermen osy kezekten shyǵarylǵan. 

2023 jyly er adam atalǵan sanat boıynsha qaıtadan kezekke turǵyzylǵan. Biraq ol sotqa júginip, 2012 jyldan bastap kezekti qalpyna keltirýdi talap etken. Kezekten negizsiz shyǵarylǵanyn jáne óziniń tirkelgen turǵyn úıdiń joqtyǵyn kórsetken. Qazirgi ýaqytta talap qoıýshy týystarynyń úıinde turady. 

«Sotta talap qoıýshynyń atyna jyljymaıtyn múlik tirkelmegeni anyqtaldy. Turǵyn úı komıssııasynyń hattamasy jáne talap qoıýshynyń kezekten shyǵarý týraly jazbasha ótinishi, tirkelgen jyljymaıtyn múliktiń bolmaýy negizge alyndy. Osyǵan baılanysty mamandandandyrylǵan aýdanaralyq ákimshilik sot aýdan ákiminiń tıisti qaýlysynyń kúshin joıý arqyly talap qoıýdy qanaǵattandyrdy. Sot oblystyq turǵyn úı basqarmasyna qatysty zań buzýshylyqtardy kórsetip, jeke uıǵarym shyǵardy. Aýdan ákimi bul sheshimge daý aıtý barysynda ákimniń qaýlysyna shaǵymdaný merzimi ótip ketkenin atap kórsetken. Oblystyq sot birinshi satydaǵy sottyń sheshimin ózgerissiz qaldyrdy», - dep málim etti Qyzylorda oblysynyń mamandandyrylǵan aýdanaralyq ákimshilik sotynan.

Eske salsaq, budan buryn Qyzylordada kúıeýinen qorqyp, balkonnan sekirip ketken áıel múgedek bolyp qaldy.