Turǵyn úı kezegi: Zań jobasynda ne qaralyp jatyr

<p>ASTANA. KAZINFORM &ndash; Byltyr elimizde 17,5 mln sharshy metr úı qoldanysqa berilgen. Bıyl ekonomıkalyq ósýdi qamtamasyz etý jónindegi birinshi kezektegi is-qımyldar josparyna sáıkes, kórsetkishti 18 mln sharshy metrge deıin arttyrý kózdelip otyr. Bul týraly Ortalyq kommýnıkatsııalar qyzmetiniń alańynda ótken brıfıngide QR Ónerkásip jáne qurylys mınıstrligi Qurylys jáne turǵyn úı-kommýnaldyq sharýashylyq isteri komıteti tóraǵasy Baqytjan Júnisbekov aıtty.</p>

Keıingi júrgizilgen statıstıkaǵa sáıkes, jalpy turǵyn úı kezeginde barlyǵy 648 myńnan astam adam tur eken. Onyń ishinde:

- Ekinshi dúnıejúzilik soǵys ardagerleri – 26;

- Jetim balalar, ata-anasynyń qamqorlyǵynsyz qalǵan balalar – 61 618;

- Kópbalaly analar, kópbalaly otbasylar – 130 167;

- Halyqtyń áleýmettik osal toptary – 254 471;

- Bıýdjettik qyzmetkerler, memlekettik qyzmetshiler, áskerı qyzmetshiler – 198 205;

- Jalǵyz turǵyn úıi apatty dep tanylǵan QR azamattary – 3 812.

«Turǵyn úı-kommýnaldyq ınfraqurylymdy damytýdyń 2023-2029 jyldarǵa arnalǵan tujyrymdamasy sheńberinde áleýmettik osal sanattaǵy kezekte turǵandarǵa satyp alý quqyǵynsyz turǵyn úı kezektilik tártibimen jalǵa beriledi. Bul rette, jalǵa beriletin turǵyn úıdiń jalpy kóleminiń keminde 20%-y satyp alý quqyǵynsyz jetim balalar men kóp balaly otbasylarǵa úlestiriledi. Ótken jyly atalǵan memlekettik qoldaý sharalary sheńberinde kezekte turǵan 9 myńǵa jýyq adam turǵyn úımen qamtamasyz etildi. 2024 jyly 8 aıda 6 737 azamat turǵyn úımen qamtyldy», - dedi Baqytjan Júnisbekov.

Jalpy, jyl saıyn 2029 jylǵa deıin 10 myńǵa jýyq kezekte turǵandardy satyp alý quqyǵynsyz jalǵa beriletin turǵyn úımen qamtamasyz etý josparlanyp otyrǵanyn atap ótken jón.

Qazirgi ýaqytta QR Parlamenti Senatynyń qaraýynda turǵyn úı saıasatyn reformalaý máseleleri boıynsha zań jobasy jatyr. Onda halyqtyń áleýmettik osal toptary úshin buryn berilgen jaldamaly turǵyn úıdi satyp alý quqyǵynsyz jekeshelendirý quqyǵyn berý bóliginde qoldaý tapqan.

«Budan basqa, zań jobasy sheńberinde depýtattar azamattardyń segiz sanatyna turǵyn úı alýǵa birinshi kezektegi quqyq berýdi usyndy. «Otbasy Banki» zań jobasy sheńberinde ulttyq damý ınstıtýty bolyp qaıta qurylady, onyń negizgi mindeti – respýblıka boıynsha azamattardy turǵyn úımen qamtamasyz etý boıynsha turǵyn úı qatynastaryn damytý. Ákimdikterde bar kezekte turǵandardyń aǵymdaǵy bazasy turǵyn úıdi esepke alýdy, qoıýdy jáne bólýdi ortalyqtandyrylǵan túrde júzege asyratyn «Otbasy Bankine» beriletin bolady. Kezekte turǵandardy satyp alý jáne salý arqyly turǵyn úımen qamtamasyz etý ákimdikterdiń enshisinde qalady. Turǵyn úıdi bólý esepke qoıylǵan kúnge jáne tabys deńgeıine baılanysty usynylyp otyrǵan túzetýlermen júzege asyrylatyn bolady», - dedi B. Júnisbekov.