Turǵyn úı daǵdarysy: Ulybrıtanııada baspanasy joq adamdar kóbeıdi

<p>Anglııada úısizderdiń sany shamamen 7 protsentke ósti. Jergilikti bılik turǵyn úı daǵdarysyn eńsere almaı keledi. Ótken jyly baspanasyz qalǵan otbasylar men dalada qalý qaýpi tónip turǵandardyń sany úsh júz myńǵa jetken. Olardyń arasynda balalary bar júz myńnan astam otbasy bar, deıdi <a href="https://kaz.inform.kz/" target="_blank" rel="noopener">Kazinform</a> tilshisi.</p>

Ulybrıtanııanyń Premer-mınıstri Rıshı Sýnaktyń bir jyl buryn Rojdestvo aldynda erikti retinde Londondaǵy úısizderge tańǵy as taratqany bar. Úkimet basshysy Dın esimdi azamattan bıznespen aınalysasyz ba dep surady. Ol úısiz-kúısiz ekenin, tek aman qalýdyń amalyn izdep júrgenin aıtty.

Osy oqıǵadan keıin halyq bireý toıyp sekiredi, bireý tońyp sekiredi, dep Premerdi aıyptady. Óıtkeni Sýnak úshinshi Charlz Patshadan da baı adam ekenin bári biledi.

«Premer-mınıstr elde bári tamasha dep jyly jaýyp qoıǵysy keledi. Biraq biz ár apta saıyn onyń shynaıy ómirden qanshalyqty alshaq ekenin ańǵaryp júrmiz. Syrtqy qaryz 2010 jyldan beri eki ese ósti, ekonomıkalyq ósim baıaýlady, salyqtyń kólemi kóbeıdi, ekonomıka quldyrady. Apta saıyn baıaǵy jartas - bir jartas, burynǵy problemalardy talqylaımyz da otyramyz», - deıdi oppozıtsııalyq Leıborıster partııasynyń kóshbasshysy Kır Starmer.

Ótken jyly jarııalanǵan baǵdarlamasynda konservatorlar úkimeti turǵyn úı daǵdarysyn eńserý úshin bul salaǵa aldaǵy úsh jyl ishinde eki mıllıard sterlıng fýntyn quıýǵa ýáde etken bolatyn. Budan bólek páter jaldaýshylardyń dalada qalýynyń aldyn alý úshin úı ıelerine aqsha tóleýge, jańa baspana izdeýge kómektesýge jáne basqa jerge kóshýine qarjylyq kómek berýge taǵy bir mıllıard fýnt ınvestıtsııa salatynyn aıtty.

«Biz árbir otbasyn qaýipsiz jáne jaıly baspanamen qamtamasyz etýge, sondaı-aq jastardyń úıli bolýlaryna múmkindik jasaýǵa tyrysamyz. Konservatorlar mıllıondaǵan jańa turǵyn úı nysandaryn salý úshin belsendi jumys istep jatyr», deıdi Ulybrıtanııanyń Turǵyn úı jáne kommýnaldyq sharýashylyq mınıstri Maıkl Goýv.

Úkimet óz ýádesin tolyq oryndaı aldy ma? Joq, árıne. Óıtkeni bıýdjette qarajat tapshy. Tek Londonda úısizderge qol ushyn sozý úshin jarty mıllıard sterlıng fýnty jetispeıdi.

Baspanasyzdardyń sany boıynsha Manchester kósh bastap tur. Jergilikti qaıyrymdylyq uıymdarynyń málimeti boıynsha, qalanyń árbir sekseninshi turǵynynyń turaqty meken-jaıy joq.

«Túnde óte sýyq, dalada uıyqtaý qıyn. Kún saıyn tańerteń denemdi sál jylytý úshin erte turyp, jaıaý júremin. Keshe túnde qatty jańbyr jaýdy. Dúkenniń aldyndaǵy shatyrdyń arqasynda ǵana qurǵaq qalýym múmkin boldy», deıdi Manchesterdiń úısiz turǵyny Mark.

Ómir súrý qunynyń ósýine baılanysty jeke sektordaǵy páter jaldaý aqysy da kúrt ósti. Tipti jumys isteıtin adamdar da úı-jáı jaldaı almaı qınalýda. Arzan baǵadaǵy mýnıtsıpaldy turǵyn úı jaldaǵysy keletinder óte kóp bolǵandyqtan kezekti uzaq ýaqyt kútý kerek.

«Men páterdi bir táýlikke jalǵa aldym. Endi Londonda zattarymdy arqalap júrmin jáne osy túnde qaıda qonatynymdy bilmeımin», deıdi Londonnyń úısiz turǵyny Nıkol Ýılıams.

Úısizder týraly jaǵa ustarlyq derekter jarııalanǵannan keıin, búkil el boıynsha birqatar qaıyrymdylyq uıymdary Turǵyn úı járdemaqysynyń kólemin ulǵaıtý qajettigin aıtty.

«Turǵyn úı járdemaqylaryn ósirýge tyıym salyp tastady. Inflıatsııaǵa baılanysty páter jaldaý aqysy ósti, biraq járdemaqy ózgerissiz qalyp otyr. Olar baspanasyzdardy qoldaýǵa arnalǵan edi. Biraq qazir kólemi az. Úkimet járdemaqyny múmkindiginshe tezirek kóterýi kerek», deıdi Ulybrıtanııanyń Baspanasyzdardy qoldaýǵa arnalǵan qaıyrymdylyq uıymynyń atqarýshy dırektory Pollı Nıt.

Qalalyq keńesterdiń basshylyǵy leıborısterdiń bılikke kelip, jaǵdaıdy ózgertkenderin asyǵa kútip júr.

Sarapshylardyń boljaýynsha, kelesi úkimetti oppozıtsııa basqarýy ábden múmkin. Óıtkeni Torılerden qadir ketti, halyq olarǵa senýden qaldy.