Turdyqul Shańbaı: Prezıdent kótergen ár bastama halyqtyń kóńilinen shyqty

ÓSKEMEN. QazAqparat – Abaıdyń «Jıdebaı-Bórili» memlekettik tarıhı-mádenı jáne ádebı-memorıaldyq qoryq-mýzeıiniń dırektory Turdyqul Shańbaı Prezıdent Qasym-Jomart Toqaevtyń «Halyq birligi jáne júıeli reformalar – el órkendeýiniń berik negizi» atty Qazaqstan halqyna Joldaýyna qatysty pikir bildirdi, dep habarlaıdy QazAqparat tilshisi.

«Memleket basshysy osy Joldaýyn Táýelsizdiktiń bárinen qymbat ekeninen bastady. «Egemendik degenimiz – jalań uran men jalyndy sóz emes. Biz úshin eń mańyzdysy – ár azamattyń Táýelsizdik ıgiligin sezine alýy» dedi Prezıdent. Rasymende Táýelsizdiktiń ıgiligi – bul asa qudyretti sóz. Abaı mýzeıiniń qyzmetkerleri májilis zalyna jınalyp, Joldaýdy tyńdap, óz oıymyzdy ortaǵa saldyq. Jeti baǵyt boıynsha josparlanǵan isterdi tyńdap, eńsemiz kóterilip, marqaıyp qaldyq. Halyqtyń ál-aýqatyn arttyrýǵa erekshe den qoıylǵany qýantady. Prezıdent kótergen ár bastama halyqtyń kóńilinen shyqty», - dedi ol.

Onyń aıtýynsha, byltyr Prezıdenttiń tikeleı qoldaýymen Abaı mýzeıi jandana tústi.

«Hakimniń 175 jyldyq mereıtoıyna Qasym-Jomart Kemeluly ózi kelip, jańarǵan mýzeıdi ashyp berdi. Halyq arasynda búginde Abaı mýzeıi týraly «Danalyq pen jańalyqtyń úndesken mýzeıi» degen tirkes te qalyptasty. Pandemııanyń asqynyp turǵan kezinde, Abaı mýzeıinde qurylys, qaıta jańǵyrtý jáne ǵylymı-tanymdyq jumystar óte qarqyndy júrdi», - dedi Turdyqul Shańbaı.