«Turan» óz tarıhynda tuńǵysh ret voleıboldan el chempıony atandy
Keshe Asqar Shalqybekov jattyqtyratyn túrkistandyqtar 3:1 esebimen basym túsip, altynǵa bir qadam jaqyndaı túsken edi.
Búgin komandalardyń bastapqy quramynda ózgeris bola qoıǵan joq. «Turanda» Sana Anarqulova, Maıra Koldına, Janna Syroeshkına, qytaılyq Sýn Sıaosıýan, reseılik Elena Samoılenko, serbııalyq baılanystyrýshy Anjela Veselınovıch, lıbero Sandýǵash Asanova alańǵa shyqty.
Oral voleıbolynyń túlegi, Qazaqstan ulttyq quramasynyń kapıtany S. Anarqulova osyǵan deıin Óskemenniń «Altaıy» sapynda áldeneshe ret el chempıony atanǵan edi. Bul joly ol jańa komandasynda jasyndaı jarqyldady.
«Bereldiń» bas bapkeri Rıshat Gılıazýtdınov myna oıynshylarǵa senim artty: Krıstına Anıkonova, Svetlana Nıkolaeva, Bota Ýataeva, reseılik Irına Malkova, serbııalyqtar Sara Sakradzııa, baılanystyrýshy Aleksandra Chırovıch, lıbero Mádına Beket.
Birinshi partııada túrkistandyqtar 10:14 esebimen jeńilip jatyr edi.
Osy kezde dopty oıynǵa qosqan Sana Anarqulovanyń sheberligi arqasynda «Turan» tarazy basyn teńestirip qana qoımaı, alǵa shyqty — 15:14.
Set sońyna taman Janna Syroeshkına da dop berýde sheberlik tanytty. Al núkteni Sana qoıdy — 25:23.
Ekinshi partııada «Turan» aıqyn basymdylyqpen jeńdi — 25:14. R.Gılıazýtdınov baılanystyrýshy Elızaveta Meısterdi, Oral voleıbolynyń taǵy bir túlegi Zarına Sıtqazınovany qosyp kórgenimen, odan eshteńe óne qoıǵan joq.
Úshinshi sette túrkistandyqtar 16:8 esebimen alǵa ketti. Aqyry qarsylastaryna esh múmkindik qaldyrǵan joq — 25:11.
Óskemenniń «Bereli» kúmis júldeni qanaǵat tutty. Qola júldeger erteń belgili bolady.
Eske sala keteıik, budan buryn voleıboldan el chempıonatynda «Turannyń» fınalda birinshi matchta jeńiske jetkenin jazǵan bolatynbyz.