Turaqty sheshim qabyldaıtyn ýaqyt jetti - Ǵalym Jaılybaı
Onyń aıtýynsha, prezıdent saılaýy týraly úndeý der ýaqytynda týǵan úndeý boldy.
«Álemde qazir turaqsyzdyq beleń alyp tur. Osyndaı almaǵaıyp ýaqytta ýaqytsha dúnıelermen otyrýǵa bolmaıdy. Turaqty sheshimder qabyldaıtyn kún jetti. Qazaq degen halyq tilek tilegende saýatsyz bolsa da batasyna, tilegine «el aman, jurt tynysh bolsyn» degen tilek tilep ótken. Biz úshin odan úlken tilek joq. Álemde aqyl-oı alamany bastaldy. Ár ult, ár memleket jantalasyp qoǵamda álemdik úlken aıdynda óz kemesiniń, qaıyǵynyń durys baǵytta júrýin tileıtin ýaqyt boldy. Maǵan búgingi úndeýde eń unaǵany Prezıdent Qasym-Jomart Toqaev saılaýdyń adaldyǵyna kepildik beremin dep aıtty. Ár otbasy - kishkentaı Otan, úlken Otanymyzdy durys adam basqarǵanyn jurttyń aman bolǵanyn qalamaıtyn ult joq. Aldaǵy saılaýlardan bul jolǵy saılaýdyń jóni bólek. Tezirek Memleket basshysyn saılap alyp, ary qaraı baǵdarlamalarymyzdy jasaý kerek», - dedi aqyn Ǵalym Jaılybaı.
Aıta ketý kerek, búgin Aqorda Memleket basshysy Qasym-Jomart Toqaevtyń Qazaqstan Respýblıkasy Prezıdentiniń kezekten tys saılaýyn taǵaıyndaý týraly Jarlyǵyn jarııa etti.
Jarlyqqa sáıkes, Qazaqstan Respýblıkasy Prezıdentiniń kezekten tys saılaýy 2019 jyldyń 9 maýsymynda ótetin boldy.
Óz sózinde Qasym-Jomart Toqaev saılaýdyń ashyq, ádil ótetinine ózi kepildik beretinin aıtty.
«Qazaqstan - demokratııalyq memleket. Prezıdent halyqtyń tańdaýymen saılanady. Men, Memleket basshysy retinde, saılaýdyń taza, ashyq ári ádil ótýine kepildik beremin! Bul - meniń berik ustanymym! Aldymyzda zor mindetter tur. Men halqymyzǵa, ıaǵnı Sizderge senemin», - dedi Qasym-Jomart Toqaev.