Turaqty damýdyń jalpy maqsattary

ALMATY. QazAqparat - QazUÝ rektory Ǵalym Mutanov Avstrııanyń Qazaqstandaǵy Elshisi Vıllı Klemenspen kezdesý barysynda ǵylym, bilim jáne ınnovatsııalardy damytý salasyndaǵy yntymaqtastyq perspektıvalaryn talqylady.

Qurmetti qonaqty qarsy ala otyryp, rektor Ǵalym Mutanov Avstrııa «jasyl ekonomıkany» ustanatyn, ǵylymy men bilimi damyǵan, tarıhy men mádenıeti baı el ekenin atap ótti.

Qos dostas memleket arasyndaǵy ǵylymı-bilim berý salasyndaǵy yntymaqtastyq sońǵy jyldary qarqyndy damýda jáne de ony keńeıtýde úlken áleýetke ıe.

Sonymen birge rektor QazUÝ-dyń Avstrııa joǵary oqý oryndarymen, atap aıtqanda Vena ekonomıka jáne bıznes ýnıversıteti, Insbýrg jáne Klagenfýrt ýnıversıtetterimen ózara tyǵyz baılanys jaıly aıtyp, ondaǵy qazaqstandyq stýdentter akademııalyq utqyrlyq boıynsha jáne ǵylymı zertteýler sheńberinde oqýdan jáne taǵylymdamadan ótip jatqandyǵyna toqtaldy.

QazUÝ-da Eýropalyq zertteýler ınstıtýty tabysty jumys atqarýda, sheteldik áriptestermen birlesken jobalar iske asyrylýda. Ol Avstrııanyń joǵary oqý oryndarymen yntymaqtastyqty keńeıtý úshin úlken múmkindik baryn atap ótti.

Óz kezeginde Avstrııa Elshisi Vıllı Klemens kezdesýge alǵys bildirip, ǵylym adamy retinde bilim berý salasyndaǵy bastamalar men jobalardy qyzý qoldaıtynyn atap ótti. Onyń erekshe nazaryn ýnıversıtettiń turaqty damý salasyndaǵy tájirıbesi aýdardy.

QazUÝ Birikken Ulttar Uıymynyń Jahandyq haby bolyp tabylatyn álemniń on joǵary oqý ornynyń biri jáne 2014 jyldan bastap turaqty damý boıynsha «Akademııalyq yqpal» baǵdarlamasyn basqaryp úılestirýde.

Atap óterlik jaıt, qazaqstandyq ýnıversıtet turaqty damý boıynsha Pan Gı Mýn halyqaralyq ınstıtýttar jelisin qurýdyń bastamashylarynyń biri boldy.

Avstrııadaǵy Alpbahta ótken jahandyq forýmda QazUÝ strategııalyq seriktes retinde BUU alǵa tartqan turaqty damý maqsattaryn júzege asyrýdaǵy yntymaqtastyq týraly kelisimge qol qoıdy.

QazUÝ-dyń Jahandyq hab retindegi qyzmetin joǵary baǵalaı otyryp, Vıllı Kempel bul, eń aldymen, halyqaralyq deńgeıde tabysty oryndalyp jatqan jaýapty mıssııa ekenin atap ótti.

Ol QazUÝ men Avstrııa ýnıversıtetteri osy mańyzdy baǵytta odan ári belsendi ózara yntymaqtasyp, turaqty damý maqsattary boıynsha birlesken jobalarǵa bastamashylyq jasaı alatynyna senim bildirdi.

Taraptar osyndaı is-áreketterge jan-jaqty qoldaý kórsetýge jáne olardy ilgeriletýge járdemdesýge daıyn ekendikterin bildirdi.

Sondaı-aq, turaqty damý boıynsha birlesken halyqaralyq konferentsııalar ótkizý týraly ýaǵdalastyqqa qol jetkizildi.