Týragent ondaǵan qostanaılyqty taqyrǵa otyrǵyzdy

QOSTANAI. QazAqparat – Shetelge arzan baǵamen baryp qaıtýdy usynyp, biraq týrdy uıymdastyra almaǵan agent «alaıaqtyq» kúdigimen ustaldy. Polıtsııaǵa 50 qostanaılyqtan shaǵym túsken, kúdikti olarǵa 60 mıllıon teńge qaryz bolyp qaldy, dep habarlaıdy QazAqparat tilshisi.

Týragent-jeke kásipker Alena Fedotovaǵa alǵashqy aryz 2022 jyldyń tamyzynda túsken. Biraq, jańa klıentter, onyń ishinde Rýslan esimdi azamat, bul týraly bilmegen. Byltyr qazanda jas jigit tanystarynyń usynysymen múmkindikti paıdalanyp, «tıimdi joldama» satyp alǵan.

«Biz Egıpetke joldama aldyq. Týrdy bólip tóleýge alyp, sońǵy tólemdi jeltoqsanda jasadyq. Ol jalpy 690 myń teńge bolǵan. Demalys 2023 jyldyń 18 naýryzynda bastalýy kerek edi. Biz joldamany jeke kásipker Alena Fedotovadan aldyq. Ol týraly buǵan deıin qyzmetterin paıdalanǵan tanystarymyzdan estidik. Eshqandaı kúdik bolmady», - deıdi ol.

Eshteńeden kúdiktenbegen Rýslan demalysqa ushý úshin naýryzdy kútken. Tipti, aqpanda dál osy týragentten bul joly Dýbaıǵa joldama satyp alýdy sheshedi.

«Egıpetke ushatyn kúnge deıin eshteńeden kúdiktenbeı bıletti kúttik. Dál ushatyn kúni ol (Alena Fedotova – red.) týrdy satyp alyp úlgermegeni týraly habarlama jiberdi», - dep atap ótti Rýslan.

Zardap shekken azamattyń aıtýynsha, ol aqshasyn tólep, demalyssyz qalǵan jalǵyz adam emes. Fedotovaǵa elýge jýyq qostanaılyq aldanǵan.

Osyndaı jaǵdaı Qostanaı turǵyny Áselde de bolǵan. Ol da Fedotovadan týr satyp alyp, naýryzda ushýy kerek edi.

«Týrdy 2022 jyldyń qazanynda aldym. Bólip tóledim. Sońǵy tólemdi bıyl qańtarda jasadym. Buǵan deıin men Alenadan týr satyp alǵanmyn. Qazanda demalystan kelgen kezde tıimdi baǵadaǵy kelesi týrdy usyndy, kelistim. Eki adamǵa 680 myń teńge tóledik. Tórt adam bolyp ushýdy josparlaǵan edik», - dep atap ótti Ásel.

Qostanaı oblystyq polıtsııa departamenti osy oqıǵaǵa qatysty pikir bildirdi.

«Týrıstik agent A. Fedotovaǵa qatysty bıyl naýryzda QR QK 190-baby 3-tarmaǵy «Alaıaqtyq» boıynsha sotqa deıingi tergeý bastaldy. A. Fedotovadan qorǵaýshy alý quqyǵyna ıe kýáger retinde jaýap alyndy. 2023 jyldyń 2 maýsymynda ol kúdikti dep tanyldy», - dep habarlady vedomstvodan.

Qylmystyq is boıynsha 50 adam zardap shekken, olarǵa 60 mln teńge shyǵyn keltirilgen. Tergeý amaldary júrip jatyr. Qajetti taldaý taǵaıyndaldy, sonyń qorytyndysy boıynsha protsessýaldyq sheshim qabyldanady.