Týnıste shet memleketten kelgenderdiń barlyǵy bir aptalyq karantınge jatqyzylady

NUR-SULTAN. QazAqparat - Týnıs úkimeti 9-16 mamyr aralyǵynda tolyq lokdaýn engizdi, dep habarlaıdy QazAqparat QR Úkimeti janyndaǵy Qazaqstanda koronavırýstyń taralýyna jol bermeý jónindegi vedomstvoaralyq komıssııanyń Telegram kanalyna silteme jasap.

Komendanttyq saǵat rejımi 19:00-den 5:00-ge deıin áreket etedi. Sondaı-aq, respýblıkada qalalar arasynda jol júrýge, sporttyq jáne mádenı is-sharalarǵa tyıym salyndy, azyq-túlik dúkenderinen basqa bazarlar men kásiporyndar jabyldy. 3 mamyrdan bastap Týnıs bıligi elge kelgenderdiń barlyǵyn bir aptalyq karantınnen ótýge mindettedi.

Eýropalyq komıssııanyń basshysy koronavırýs ınfektsııasyna qarsy vaktsınalarǵa patentterdi alyp tastaý olardyń óndirisin qysqa jáne orta merzimdi perspektıvada keńeıtý máselesin sheshpeıdi dep habarlady. Ol jaqyn arada bul máseleni sheshý úshin qolda bar vaktsınalarmen bólisip, olardyń óndirisin keńeıtýge qarajat salý kerek dep sanaıdy.

Úndistandaǵy koronavırýstyń úshinshi tolqynynan qashyp qutylý múmkin emes, - dep málimdedi el Úkimetiniń Bas ǵylymı keńesshisi. Sheneýnik elde ınfektsııanyń jyldam taralýyna áser etetin jańa shtamdarmen kúresý úshin COVID-19 vaktsınalaryn jetildirý qajet dep eskertti.

Aldaǵy ýaqytta vaktsına saldyrǵanǵa qaramastan, aýrýdyń aýyrlyǵyn arttyratyn vırýstyń jańa nusqalary paıda bolady. Úndistan koronavırýs ınfektsııasyn juqtyrýdyń jańa jaǵdaılary boıynsha álemde ekinshi orynda.