Tuńǵysh taıtuıaqty qaraǵandylyq 16 jasar mergen atyp aldy

KÓKShETAÝ. QazAqparat - Jamby atýdan (at ústinde sadaq atý) jasóspirimder, jastar, eresekter arasyndaǵy Qazaqstan chempıonaty aıaqtaldy. Kókshetaý qalasynda ótken el birinshiliginde tarıhı oqıǵav oryn aldy, dep habarlaıdy QazAqparat.

QR jamby atý federatsııasy at ústinde sadaq atý ónerindegi tarıhı dástúrdi qaıta jańǵyrtyp, chempıonattan tys at qylyna baılanǵan taıtuıaqty nysanaǵa tikken bolatyn.

Halyqaralyq deńgeıde el namysyn qorǵap júrgen eresek mergenderimizdiń ózi múlt ketip, tuńǵysh taıtuıaqtyń ıesi anyqtalmaı, federatsııa tarapynan taǵaıyndalǵan 300 000 teńge júldesimen qosa kelesi jarysqa qalady degen boljamdar aıtylǵan bolatyn.

Eresekterden keıin, jastar arasyndaǵy el chempıondary da taıtuıaqqa jebelerin tıgize almady.

Jarystyń sońǵy kúnderinde atqa qonǵan jasóspirimderge de múmkindik berildi. Buǵanasy qatpasa da, at ústindegi bala mergenderdiń arasynan qaraǵandylyq Nurasyl Oralhan at qylyna baılanǵan taıtuıaqqa jebesin dál tıgizip, tarıhı rekord ornatty.

Taıtuıaqtyń dıametri 10*10, salmaǵy 318 gr, farfordan quıylǵan, 4 metr bıiktikte at qylyna baılanǵan. Mergender atpen 120 metr qashyqtyqta shaýyp ótip nysanany kózdedi.

Sondaı-aq, osyǵan deıin jambyshylar «qazaq», «túrik», «koreı» stılderinde atyp, úsh nysananyń jıyntyǵynda jeńimpaz anyqtalatyn. Bıylǵy chempıonatta úsh nysana boıynsha úsh bólek oryndar men jeńimpazdar anyqtalyp, ulttyq qurama músheleriniń sany úsh esege artty.

Jamby atýdan QR chempıonatynyń qorytyndysy boıynsha eresekter arasynda Jambyl oblysy, jastar men jasóspirimder arasynda Túrkistan oblysy úzdik atandy.

Atalǵan chempıonatty QR MSM Sport jáne dene shynyqtyrý komıteti, QR ulttyq sport qaýymdastyǵy, QR jamby atý federatsııasy men Aqmola oblysynyń ákimdigi uıymdastyrdy. Chempıonattyń jeńimpazdary men júldegerlerine QR ulttyq sport qaýymdastyǵy taǵaıyndaǵan 3 675 000 teńge júlde qory tabystaldy.

At ústindegi mergender 27 maýsym kúni Vengrııanyń Pomaz qalasynda ótetin Álem kýbogine daıyndyq ústinde. El namysyn qorǵaıtyn - Eralhan Aıkóz, Baqdáýlet Babajan, Batyr Beksaýyt, Madııar Sháripbaev syndy mergender.