Tuńǵysh Prezıdent rólin somdaý - halyq aldynda úlken jaýapkershilik - akter N. Álimjanov

ASTANA. QazAqparat - «Tyǵyryqtan jol tapqan» fılminde QR Prezıdenti Nursultan Nazarbaevtyń rólin somadaǵan qazaqstandyq akter Nurlan Álimjanov fılm premerasynda kınojoba jaıyndaǵy oılarymen bólisti.

Akter Elbasynyń rólin somdaý barysynda halyq aldynda úlken jaýapkershilik sezingenin aıtady.

«Bul tarıhı beıne. Árıne, jaýapkershilik úlken. Soǵan qaramastan halyq pen Prezıdent bizge óz batasyn berdi», - deıdi ol.

Aıta keteıik, Astanadaǵy «Qazaqstan» ortalyq kontsert zalynda Elbasy Nursultan Nazarbaevtyń qatysýymen «Tyǵyryqtan jol tapqan» fılminiń premerasy ótýde.

QR Mádenıet jáne sport mınıstrliginiń tapsyrysymen Sháken Aımanov atyndaǵy Qazaqfılm kınostýdııasynyń QR Tuńǵysh Prezıdenti jaıly túsirilgen «Tyǵyryqtan jol tapqan» fılmi «Elbasy joly» kınoepopeıasynyń tórtinshi bólimi bolyp tabylady.

Onda Qazaqstan Prezıdenti Nursultan Nazarbaevtyń 1970-shi jyldardaǵy eńbek joly, saıasatqa endi ǵana qadam basqan sátteri sýrettelgen. Fılmniń rejısseri - Rústem Ábdirashov.

Eske sala keteıik, 2011 jyldan beri «Elbasy joly» kınoepopeıasy túsirilip kele jatyr. Bunyń aldynda kınoepopeıaǵa «Balalyq shaǵymnyń aspany» (2011), «Otty ózen» jáne «Temir taý» (2013) fılmderi engen bolatyn.

«Tyǵyryqtan jol tapqan» fılminiń túsirilimi 2014 jyly aqpan aıynda bastaldy. Kınoǵa qazaqstandyq akterlermen birge Valentın Gaft, Evgenıı Sıdıhın, Vladımır Steklov, Evgenıı Stychkın, Vıktor Sýhorýkov syndy reseılik akterler endi. Elbasynyń beınesin qazaqstandyq akter Nurlan Álimjanov somdady. Fılm kópshilik nazaryna 4 jeltoqsanda Qazaqstannyń 25 qalasynda 50 kınoteatrda tartý etiledi dep josparlanǵan.