Tuńǵysh Prezıdent kúni: Elordada I respýblıkalyq jas patrıottar forýmy ótti

NUR-SULTAN. QazAqparat – Nur-Sultan qalasyndaǵy QR Qarýly Kúshteriniń Ulttyq áskerı-patrıottyq ortalyǵynda VII Respýblıkalyq «Aıbyn-2021» áskerı-patrıottyq jastar jıynynyń saltanatty jabylý sharasy ótti, dep habarlaıdy QazAqparat tilshisi.

Tuńǵysh Prezıdent kúni men Táýelsizdiktiń 30 jyldyǵyna arnalǵan «Egemen el erteńi – jas sarbaz» atty I respýblıkalyq jas patrıottar forýmynyń aıasynda «Aıbyn-2021» áskerı-patrıottyq jastar jıynynyń qorytyndysy shyǵarylyp, jeńimpazdardy marapattaý rásimi ótti.

Sharaǵa «Jas sarbaz» respýblıkalyq balalar-jasóspirimder áskerı-patrıottyq qozǵalysynyń ókilderi ár aımaqtan onlaın rejımde qosyldy.

Forým barysynda túrli salada óz ornyn taýyp, jemisti bilim alyp júrgen jas patrıottar óz jetistikterin pash etip, usynys-tilekterin aıtty. Snyń biri – Almaty oblysynyń týmasy, «Jas sarbaz» qozǵalysynyń úzdik tárbelenýshisi, boks pen dzıýdodan respýblıkalyq jarystardyń júldegeri, akrobat, oqý ozaty Álı Dosman.

«Men 5 jasymnan halyqaralyq jarystarǵa qatysyp, Qazaqstandy álemdik deńgeıde tanystyryp júrmin. Men de el aǵalary sekildi kók týymyzdy álem arenalarynda jelbiretýdi armandaımyn», - degen jas akrobat «Jas sarbazdyń Qajymuqan kúshi» atty kórsetilim qoıdy.

Forýmǵa QR Parlamentiniń depýtattary, Qorǵanys, Bilim jáne ǵylym, Tótenshe jaǵdaılar, Aqparat jáne qoǵamdyq damý, Mádenıet jáne sport mınıstrlikteriniń, Ulttyq qaýipsizdik komıtetiniń ókilderi qatysty.

Al «Aıbyn» jıynyna belsendi qatysyp, áskerı-patrıottyq tárbıe jumystaryn sapaly uıymdastyrǵan úshin beriletin «Patrıottar mekeni» aýyspaly kýbogy Túrkistan oblysyna tabystaldy.