Tuńǵysh Prezıdent qory 500 balaǵa sómke syılady

NUR-SULTAN. QazAqparat - Tuńǵysh Prezıdent qory balalarǵa arnaıy qaýipsizdik jolaqshalary bar oqýshylar sómkesin syılady, dep habarlaıdy QazAqparat qordyń baspasóz qyzmetine silteme jasap.

1 tamyzdan bastap elimizdiń barlyq aımaqtarynda jyl saıynǵy «Mektepke jol» jalpyulttyq aktsııasy ótkizilýde. Onyń maqsaty – oqý jylynyń bastalýyna daıyndyq kezinde az qamtamasyz etilgen jáne kóp balaly otbasylardan shyqqan oqýshylarǵa qoldaý kórsetý.

Bul aktsııaǵa qatysý QR Tuńǵysh Prezıdenti – Elbasynyń qory úshin dástúrge aınaldy.

10 jyl ishinde qordyń atynan Qazaqstannyń barlyq aımaqtarynan 9 myń balaǵa mektep sómkeleri men keńse taýarlary túrinde materıaldyq kómek kórsetildi. Bul jyly 500 balaǵa mektepke daıyndalý úshin jaǵdaı jasaldy. Onyń ústine sómkeler sporttyq kıimmen tolyqtyryldy.

Búginde aktsııa Nur-Sultan, Almaty, Qostanaı, Petropavl qalalaryn jáne Qazaqstannyń birqatar shaǵyn qalalaryn qamtydy. Mektep sómkeleri tek qalalar ǵana emes, sonymen qatar elimizdiń osy aımaqtarynyń shalǵaıdaǵy aýyldaryna da jetkizildi.

Bıyl «Mektepke jol» keń aýqymdy aktsııasy Aqmola oblysy Qorǵaljyn aýylynda uıymdastyrylǵan «Uly dala mádenıetindegi qustardyń sımvolıkasy» atty respýblıkalyq shyǵarmashylyq festıvali barysynda uıymdastyryldy. Festıvalǵa Reseı Federatsııasy jáne Qyrǵyz Respýblıkasyn qosqanda 150 bala qatysty.

Mektep sómkeleri jaryq shaǵylystyratyn elementtermen jabdyqtalǵan. Bul balanyń qaýipsizdigne asa qajet. Sondaı-aq ár sómkeniń ishine tótenshe jaǵdaı kezinde qajet qaýipsizdik jadnamasy, qalta shamy, dabyl quraly (ysqyryq) salynǵan.