Tuńǵysh Prezıdent keńsesine bólinetin qarjy 130 mln teńgege qysqartylady

ASTANA. QazAqparat – Tuńǵysh Prezıdent Nursultan Nazarbaev keńsesine bólinetin qarjy 130 mln teńgege qysqartylady. Bul týraly Qarjy vıtse-mınıstri Dáýren Temirbekov aıtty, dep habarlaıdy QazAqparat tilshisi.

«Naqtylanǵan bıýdjet aıasynda QR Tuńǵysh Prezıdenti keńsesinen shamamen 130 mln teńgeni qysqartatyn bolamyz. Qarajat 1-1,5 mlrd teńgesi shamasynda bólingen. Sodan shamamen 130 mln teńgeni alyp tastaımyz. Bul tek osy jylǵa ǵana», - dedi Dáýren Temirbekov Senatta 2023 jylǵa arnalǵan respýblıkalyq bıýdjetti naqtylaý týraly zań jobasyn talqylaýdan keıin BAQ ókilderiniń saýalyna oraı.

Esterińizge sala ketsek, 15 aqpanda Memleket basshysy «Qazaqstan Respýblıkasynyń Tuńǵysh Prezıdenti – Elbasy týraly» Qazaqstan Respýblıkasy Konstıtýtsııalyq zańynyń kúshi joıyldy dep taný týraly» Qazaqstan Respýblıkasynyń Konstıtýtsııalyq zańyna qol qoıǵan edi.