Tuńǵysh «Qazaqstan barysy» ózin jeńgen balaǵa 50 myń teńge berdi

ASTANA. QazAqparat - Astanada ótip jatqan qazaq kúresinen álem chempıonatynyń ekinshi kúni kórermender tuńǵysh «Qazaqstan Barysy» Ulan Rysqulmen beldesý múmkindigine ıe boldy, dep habarlaıdy QazAqparat tilshisi.

Tuńǵysh barys ıegerimen beldesýge kórermender arasynda úmitkerler kóp boldy. Eresekterden eki birdeı azamat shyǵyp, utylyp qalsa, búgin de 10 jasar bala Ulan aǵasymen kúresýge bel býyp, boz kilemge shyqty.
 

Ózin Eset dep tanystyrǵan jas bala Astanadaǵy mektepterdiń birinde oqıtynyn, sondaı-aq, kúresten kýrstarǵa baryp júrgenin aıtty.

Balanyń talabyn qaıtarmaǵan Ulan Rysqul Eset baýyryna kúrestiń qyr-syryn úıretip, jeńisin syılap, 10 jasar Esetke 50 myń teńge syılyqty óz qolymen tapsyrdy.

«Bolashaqta Ulan aǵam sııaqty chempıon bolǵym keledi. Búgingi jeńisimdi ata-anama syılaımyn»,- dedi  Eset.

Al Ulan óz kezeginde bul jastardy qazaq kúresine tartý, balalardy sportqa yntalandyrý ekenin aıtyp, Eset baýyryna «shynyqsań shymyr da, chempıon da bolasyń, tek osy ekpinińnen taıma dep aq tilegin bildirdi.

Esterińizge sala keteıik, keshe álem chempıonatynyń birinshi kúni korermender úsh dúrkin Qazaqstan barysy atanǵan Beıbit Ystybaevpen kúresý jarysynda taǵy bir 10 jasar bala «jeńiske» jetken bolatyn.