Túngi qaladaǵy balalar: SQO-da úsh túnde 22 derek tirkeldi

PETROPAVL. QazAqparat – Soltústik Qazaqstan oblysynda jazǵy demalys qarsańynda ıývenaldy polıtseıler «Túngi qaladaǵy balalar» jedel-profılaktıkalyq is-sharasyn ótkizip jatyr. Nátıjesinde túnde júrgen jasóspirimderge qatysty 22 derek anyqtaldy, dep habarlaıdy QazAqparat tilshisi.

SQO Polıtsııa departamenti baspasóz qyzmetiniń málimetinshe, ıývenaldy polıtseıler jazǵy demalys qarsańynda bilim berý salasynyń qyzmetkerlerimen birge túngi kóshelermen reıd júrgizdi. Mamandar jaldamaly páterler men kottedjderdi, sýpermarketter men oıyn-saýyq mekemelerin tekserdi.

Petropavl qalasynyń Internatsıonal men Jumabaev kósheleriniń qıylysynda polıtseıler 17 jastaǵy úsh qyzdy toqtatty. Tanysynyń úıinde otyryp qalǵan olar ata-analaryna úıge taksımen oralýǵa ýáde bergen. Alaıda qyzdar saǵat 23.00-den keıin «serýendeýge» sheshim qabyldaıdy. Olar osylaısha, zań talaptaryn buzatyndyqtaryn jaqsy bilgen.

«Ata-analarǵa qatysty QR Ákimshilik quqyq buzýshylyq týraly kodeksiniń 442-babynyń 2-bóligi boıynsha hattamalar jasaldy. Áser etý sharasy – eskertý, eger ol qaıtadan buzylsa, balalardyń túngi serýeni úshin aıyppul tóleýge týra keledi. Jalpy 3 is-shara ótken 3 kúnde osyndaı 22 derek anyqtaldy. Sonymen qatar, bir zańdy ókilge jasóspirimniń ishimdik ishkeni úshin QR ÁQBtK 440-baby boıynsha jaýapkershilik júkteldi. Zańdylyqty buzý kámeletke tolmaǵandardyń olarǵa qatysty da qylmys jasaý qaýpin týdyratynyn túsiný mańyzdy. Bul týraly túsinik berý úshin oqý jylynyń sońynda ıývenaldy polıtsııa qyzmetkerleri mektepter men kolledjderdiń oqýshylarymen kezdesýler ótkizedi, zańnama talaptaryn túsindiredi, beıtanys adamdarmen qarym-qatynas kezinde qaýipsiz minez-qulyq erejeleri týraly aıtady», - deıdi oblystyq Polıtsııa departamenti Jergilikti polıtsııa qyzmeti basqarmasynyń bastyǵy Aıdyn Baımatov.