Túnde beımezgil júrgen balasyn qadaǵalamaǵan 56 qostanaılyq ata-ana jaýapqa tartyldy
«Túngi qaladaǵy balalar» respýblıkalyq jedel aldyn-alý sharasynyń birinshi kúninde ıývenaldy polıtseıler Ákimshilik quqyq buzýshylyq týraly kodeksiniń 442-baby boıynsha (Kámeletke tolmaǵandardyń zańdy ókilderinsiz saǵat 23:00-den keıin turǵylyqty úıden tys jerde bolýyna jol berý) 56 zańdy ókildi jaýapqa tartty. Sondaı-aq, «Ata-analardyń tárbıe jónindegi jáne kámeletke tolmaǵandardy oqytý mindetterin oryndamaý» babyna saı, balalardyń 8 zańdy ókiline aıyppul salyndy. Buǵan qosa jedel aldyn alý sharasy aıasynda mas kúıinde 2 kámeletke tolmaǵan bala anyqtaldy», - dep málim etti Qostanaı oblystyq polıtsııa departamentiniń baspasóz qyzmetinen.
Jergilikti quqyq qorǵaý organynyń málimetinshe, bir kún ishinde 15 turmysy nashar otbasy men 19 kámeletke tolmaǵandar anyqtalyp, olar profılaktıkalyq esepke qoıylǵan.
Aıta keteıik, «Túngi qaladaǵy balalar» sharasyn ótkizýge óńir boıynsha 430 polıtsııa qyzmetkeri, 46 bilim berý, 18 densaýlyq saqtaý jáne 22 jergilikti atqarýshy organ ókilderi jumyldyryldy.