Túmen qazaqtary pandemııa jaǵdaıynda qazaqstandyq stýdentterge kómek kórsetýde
«Jýyqta óz-ózin oqshaýlaý rejıminen shyqtyq, biraq barlyq saqtyq sharalaryn saqtaımyz. Túmen ındýstrıaldy ýnıversıtetinde oqıtyn qazaqstandyqtarǵa kómek kerek boldy», - deıdi Esenǵalı Ibraev.
Onyń aıtýynsha, Qazaqstan shetelde qalyp qoıǵan azamattardyń máselesine óte jaýapkershilikpen qaraıdy. Mysal retinde Qazaqstannyń koronavırýs pandemııasy kezinde azamattaryn elge qaıtarý boıynsha memleket júrgizgen jumystardy aıtýǵa bolady.
«Stýdentterdi úılerine qaıtarý jumystary Reseı tarapynan da, Qazaqstan tarapynan da júrgizilip jatyr. Ótken aptada 150-ge jýyq qazaqstandyq stýdent arnaıy uıymdastyrylǵan reıspen Túmennen Qazaqstanǵa ushty. Keıbir stýdentter ártúrli sebeppen úılerine qaıta almaı qaldy. Keıbiri bıyl oqýyn bitirip, qolyna dıplom alsa, endi biri pandemııa bitken soń qaıtyp kelýge aqsha jumsaǵysy kelmedi jáne otbasyna qaýip tóndirýdi qalamady», - deıdi ol.
Sonymen qatar, keıbir stýdentter materıaldyq turǵyda qıyn jaǵdaıǵa qalǵan.
«Olar menen qoldaý suraǵan, men oılanbastan olarǵa kómektesý kerek dep sheshtim. Erteńinde olarǵa qajetti azyq-túlik pen birinshi kezekte kerekti taýarlardy aldym», - deıdi Esenǵalı Ibraev.
Ol stýdenttergi Túmendegi qazaqstandyq ónimderdi satatyn «Nýbaevskıe mıasnye prodýkty» gastronomynyń basshylyǵy da kómekteskenin aıtty. Onyń aıtýynsha, endi qazaqstandyq stýdentter ol jaqta qıyndyqpen betpe-bet qalýdan qoryqpaı ómir súrip, oqý jylyn aıaqtaýyna bolady.
Olar kóp ret qoldanýǵa bolatyn medıtsınalyq maskamen, azyq-túlikpen qamtamasyz etildi.
«Stýdentterge kómektesý - bir rettik aktsııa emes. Basqa da joǵary oqý oryndaryndaǵy stýdenttermen jumys istelinip jatyr. Stýdentter men olarǵa ne qajettigi týraly tizim jasalyp jatyr», - deıdi ol.