Tumaýǵa qarsy vaktsına COVID-19 indetiniń saldaryn jeńildetýi múmkin – dáriger maman
Mundaı pikirdi QazAqparat tilshisine Ulttyq qoǵamdyq densaýlyq saqtaý ortalyǵynyń qoǵamdyq densaýlyqty jaqsartý ortalyǵynyń basshysy Jazıra Emberdıeva bildirdi, dep habarlaıdy QazAqparat tilshisi.
Tumaýǵa qarsy vaktsınamen qatar JRVI men tumaýdyń aldyn alýdyń basqa da joldary bar. Ondaı sharalardyń qataryna buqara kóp jınalatyn oryndarǵa barmaýdy, jabyq nysandarda jáne qoǵamdyq oryndarda bir rettik maskalardy paıdalanýdy, jótelgende nemese túshkirgende silekeıdi shashyratpaý úshin aýyz ben muryndy shytpen jabýdy, aýrý belgileri bar adamdarǵa jolamaýdy, qoldy jıi jýýdy, jylytý maýsymy bastalǵanda nysandardy jeldetýdi jatqyzýǵa bolady.
«Árbir adam kelesi keńesterdi saqtaı otyryp, ımmýnıtettiń myqtylyǵyn saqtaı alady: S vıtamıni nemese ıtmuryn, shyrǵanaq, qaraqat, lımony bar ónimderdi kóp tutyný kerek. Sonymen qatar dárigerdiń keńesimen ımmýnıtetti kóteretin preparattardy, vıtamınder men bıologııalyq belsendi qospalardy qabyldaǵan jón. Odan bólek salaýatty ómir saltyn saqtanyp, árdaıym deneni shynyqtyryp otyrý kerek. Jaıaý kóbirek serýendep, taza aýada júgirip, sýǵa júzgen de óte paıdaly. Sondaı-aq belogy bar ónimderdi, jemis-jıdekter men kókónisterdi kóbirek tutynyp, gazdalǵan nemese qanty kóp sýsyndardy ishpeýge tyrysqan abzal», - deıdi ol.
Ortalyqtyń basshysy tumaýǵa qarsy vaktsına COVID-19 indetiniń saldaryn da jeńildetýi múmkin ekenin eske salady.
«Maýsymdyq tumaýǵa qarsy vaktsına 50 jyldan beri egilip keledi. Vaktsına mıllıondaǵan adamǵa salynady. Onyń qaýipsizdigi ýaqyt óte kele ábden dáleldengen. Memlekettik jáne ulttyq dári-dármekterdi baqylaý organdary jyl saıyn jańa vaktsınany lıtsenzııalaý aldynda ony muqııat tekserip otyrady. Sondaı-aq, barlyq elde tumaýǵa qarsy ımmýndaýdan keıingi jaǵymsyz jaılardyń barlyǵyn baqylap, zertteıtin júıeler bar», - dedi dáriger.
COVID-19 indetine qarsy vaktsınatsııaǵa qatysty Jazıra Emberdıeva mundaı vaktsına áli jasalmaǵanyn, qazirgi kezde kóptegen elde ǵylymı ázirlemeler men zertteýler júrgizilip jatqanyn atap ótti.
«Tájirıbeniń ózi kórsetkendeı, áleýmettik araqashyqtyq, qoǵamdyq oryndarda maska taǵý, qoldy jıi jýý jáne antıseptıkti ylǵı paıdalaný - koronavırýs ınfektsııasynyń aldyn alýdyń tıimdi jáne taptyrmas sharalary bolyp qala beredi. Sondaı-aq, biz COVID-19 indetin juqtyrǵan adamdardyń 80 paıyzy jeńil kóterýi múmkin ekenin bilemiz. COVID-19 tez mýtatsııaǵa ushyraıtyn vırýstardan týyndaǵanyn bilesiz. Bir ýaqytta ártúrli shtamdar kórinýi múmkin. Vaktsınatsııa sizdiń aýyryp qalmaý yqtımaldyǵyńyzdy arttyra alady jáne koronavırýs ınfektsııasynyń aýyr zardaptarynyń qaýpin azaıtady», - dedi Jazıra Emberdıeva.